محمد سراج نے جیتا سب کا دل، پلیئر آف دی میچ کی انعامی رقم  گراؤنڈ اسٹاف کو دی

ایشیا کپ 2023 کے فائنل میچ میں محمد سراج نے اپنے ون ڈے کیریئر میں اب تک کی بہترین بولنگ کا مظاہرہ کیا اور ٹیم انڈیا کی جیت میں اہم کردار ادا کیا۔ اس میچ میں سراج نے اپنے 7 اوورز کے اسپیل میں 21 رنز دے کر 6 وکٹیں حاصل کیں۔ ان کی شاندار کارکردگی پر انہیں پلیئر آف دی میچ کا ایوارڈ بھی دیا گیا۔ اس کے بعد سراج نے اپنے ایوارڈ کی انعامی رقم سری لنکن گراؤنڈزمین کو دے دی۔

محمد سراج کو پلیئر آف دی ٹورنامنٹ کا ٹائٹل کے طور پر 5000 امریکی ڈالر ملے۔ یہ اعزاز حاصل کرنے کے بعد سراج نے کہا کہ میں کافی عرصے سے اچھی بولنگ کر رہا ہوں لیکن وکٹیں حاصل کرنے میں کامیاب نہیں ہو سکا۔ مجھے اس میچ میں کامیابی ملی۔ آج اس وکٹ پر گیند سوئنگ ہو رہی تھی اور میں نے اس کا فائدہ اٹھایا۔ میں یہ انعامی رقم گراؤنڈز مین کو دینا چاہتا ہوں۔ ان کے بغیر یہ ٹورنامنٹ ممکن نہیں تھا۔

ایشیا کپ 2023 کے فائنل میچ میں سری لنکن ٹیم نے ٹاس جیت کر پہلے بیٹنگ کا فیصلہ کیا تھا تاہم بارش کے باعث میچ تقریباً ایک گھنٹے کی تاخیر سے شروع ہو سکا۔ اس کے بعد سراج کی عمدہ بولنگ کی بنیاد پر ہندوستانی ٹیم نے سری لنکا کی اننگز کو 15.2 اوورز میں صرف 50 رنز پر سمیٹ دیا۔ ٹیم انڈیا نے یہ ہدف 6.1 اوور میں حاصل کر لیا اور 10 وکٹوں سے جیت لیا۔

سری لنکا میں ایشیا کپ کے میچوں کے دوران بارش کی وجہ سے کافی خلل پڑا ہے۔ ایسے میں گراؤنڈز مین کی مسلسل محنت نے میچز کو مکمل کرنے میں مدد دی۔ ان کے کام کو سراہتے ہوئے ایشین کرکٹ کونسل نے کولمبو اور کینڈی کے گراؤنڈز کے لیے 50,000 امریکی ڈالر کی انعامی رقم کا اعلان کیا اور فائنل میچ کے بعد انہیں یہ رقم دی۔