رنجی نظر انداز، وجے ہزارے اور خاتون ون ڈے ٹورنامنٹ کا ہوگا انعقاد

نئی دہلی: ہندوستانی کرکٹ کنٹرول بورڈ (بی سی سی آئی) نے سید مشتاق علی ٹرافی ٹورنامنٹ ٹی-20 کا فائنل 31 جنوری کو مکمل ہوجانے کے بعد 50 اوور کے وجے ہزارے ٹرافی ٹورنامنٹ اورخاتون ون ڈے ٹورنامنٹ کو منعقد کرنے کا فیصلہ کیا ہے، لیکن بورڈ کو طویل فارمیٹ کی رنجی ٹرافی کے لئے ونڈو نہیں مل پا رہی ہے۔ بی سی سی آئی کے سکریٹری جے شاہ نے ریاستی یونینوں کو خط لکھ کر یہ تصدیق کی ہے کہ خاتون ون ڈے ٹورنامنٹ کا انعقاد وجے ہزارے ٹرافی کے ساتھ ساتھ کیا جائے گا، جبکہ وینو مانکڈ انڈر-19 ٹرافی کو بعد میں منعقد کیا جائے گا۔ ٹورنامنٹ کے تفصیلی پروگرام پر کام جاری ہے۔

بی سی سی آئی نے ریاستی انجمنوں سے رنجی ٹرافی کے طویل فارمیٹ اور وجے ہزارے ٹرافی کے 50 اوور کے ٹورنامنٹ کے انعقاد کے لئے تجویز طلب کی تھی۔ سید مشتاق علی کا کورونا دور کے وقت میں کامیاب انعقاد ہوا ہے اور اب 31 جنوری کو اس کے فائنل کا انعقاد احمدآباد کے نو تعمیر شدہ سردار پٹیل اسٹیڈیم میں ہونا ہے۔ بی سی سی آئی نے گھریلو سیشن کے آغاز کے لئے ریاستی انجمنوں سے تجاویز طلب کی تھیں اور سبھی ریاستی انجمنوں نے متفقہ طور پر تجویز دی تھی کہ پہلے مشتاق علی کا انعقاد ہو۔ بیشترریاستی یونینوں کا ماننا ہے کہ وجے ہزارے کا انعقاد کیا جائے کیونکہ محدود وقت میں رنجی کا انعقاد مشکل ہوگا۔ آئی پی ایل کے 14 ویں ایڈیشن کا انعقاد اپریل میں ہونا ہے اور اس دوران بی سی سی آئی کے پاس دوماہ کا وقت بچا ہے جس میں وہ گھریلو ٹورنامنٹوں کا انعقاد کرنا چاہتا ہے۔

بی سی سی آئی کے صدر سورو گانگولی اس دوران رنجی ٹرافی کرانے کے حق میں ہیں لیکن بورڈ قومی ٹورنامنٹ کے لئے کوئی ونڈو تلاش نہیں کرپا رہا ہے۔ بی سی سی آئی کے لئے دومہینے کے وقت میں رنجی کرانا کافی مشکل ہے۔ اس لئے وہ محدود اووروں کے ٹورنامنٹ کرانے کے حق میں ہے۔ ریاستی یونینوں کو لکھے گئے اپنے خط میں، شاہ نے لکھا، "ہمارے لئے یہ یقینی بنانا ضروری ہے کہ خواتین کرکٹ کا انعقاد بھی ہو۔ مجھے یہ بتاتے ہوئے خوشی ہو رہی ہے کہ ہم سینئر ویمنز ون ڈے ٹورنامنٹ کو وجے ہزارے ٹرافی کے ساتھ منعقد کرنے جا رہے ہیں اور اس کے بعد وینومانکڈ انڈر- 19 ٹرافی کا انعقاد کیا جائے گا۔ آپ سے ملے جوابات کی بنیاد پر ہم نے یہ فیصلہ کیا۔ "

انہوں نے ریاستی یونینوں اور بی سی سی آئی کے اسٹاف کا سید مشتاق علی ٹرافی کے کامیاب انعقاد پر شکریہ ادا کیا۔ مشتاق علی سے پہلے بی سی سی آئی نے متحدہ عرب امارات میں آئی پی ایل کا کامیاب انعقاد کیا تھا۔ شاہ نے کہا، "میں آپ سب کے تعاون کا شکریہ ادا کرنا چاہتا ہوں۔ یہ دیکھ کر خوشی ہوئی کہ مشتاق علی ٹورنامنٹ کے دوران ہمیں سطح کی کرکٹ دیکھنے کو ملی اور کچھ نوجوان کھلاڑیوں نے شاندار کارکردگی کا مظاہرہ کیا۔ اب ہمیں دلچسپ اور شاندار فائنل کا انتظار ہے۔ بڑودہ اورتمل ناڈو کے درمیان اتوار کو مشتاق علی ٹرافی کے خطاب کے لئے مقابلہ ہوگا۔ نوتعمیر شدہ سردارپٹیل اسٹیڈیم میں جمعہ کو کھیلے گئے سیمی فائنل میچوں میں بڑودہ نے پنجاب کو 25 رنوں سے اورتمل ناڈو نے راجستھان کو سات وکٹوں سے شکست دی تھی۔