سال 2024: پانچ اسٹار بلے باز بنے والد، فہرست میں تین ہندوستانی کھلاڑی شامل

سال 2024 کرکٹ کے میدان میں ایک اہم سال ثابت ہوا، جہاں نہ صرف کھلاڑیوں نے کھیل کے میدان میں کارنامے دکھائے بلکہ کئی کھلاڑیوں کی ذاتی زندگی میں خوشیوں کا اضافہ ہوا۔ یہ وہ سال تھا جب کچھ کھلاڑی والد بنے اور ان کی زندگی میں ایک نیا باب شروع ہوا۔ ان میں ہندوستان کے تین کھلاڑی شامل ہیں جو اس سال والد بنے۔

سب سے پہلا نام ہندوستانی کرکٹ ٹیم کے سابق کپتان وراٹ کوہلی کا ہے۔ وراٹ کوہلی کو 2021 میں پہلی بار والد بننے کا اعزاز حاصل ہوا تھا جب ان کی اہلیہ انوشکا شرما نے ایک بیٹی کو جنم دیا تھا جس کا نام وامیکا رکھا گیا لیکن 2024 میں ان کی زندگی میں ایک اور خوشی آئی، جب ان کے گھر ایک بیٹے کی آمد ہوئی جس کا نام اکائے رکھا گیا۔ اس سال کے آخر میں وراٹ کوہلی نے ٹی-20 کرکٹ سے ریٹائرمنٹ کا اعلان کیا لیکن وہ آئی پی ایل میں کھیلنا جاری رکھیں گے۔

دوسرا نام ہندوستانی کرکٹ ٹیم کے موجودہ ٹیسٹ کپتان روہت شرما کا ہے۔ روہت شرما کو 2018 میں پہلی بار بیٹی کی خوشی نصیب ہوئی تھی اور اس سال، نومبر میں ان کے گھر ایک بیٹے کی پیدائش ہوئی۔ روہت بھی کوہلی کی طرح ٹی-20 کرکٹ سے ریٹائر ہو چکے ہیں لیکن وہ ایک روزہ اور ٹیسٹ کرکٹ میں ہندوستان کی قیادت کر رہے ہیں۔

نیوزی لینڈ کے بلے باز کیون ولیمسن بھی 2024 میں تیسری بار والد بنے۔ ان کی اہلیہ سارہ رحیم نے 28 فروری 2024 کو ان کی دوسری بیٹی کو جنم دیا، جس کے بعد ان کی زندگی خوشیوں سے بھر گئی۔ کیون ولیمسن کا یہ سال خوشگوار رہا، کیونکہ وہ اپنے خاندان کے ساتھ مزید وقت گزارنے کے ساتھ کرکٹ میں بھی کامیاب ہو رہے ہیں۔

آسٹریلوی کرکٹر ٹریوس ہیڈ نے بھی 2024 میں والد بننے کا شرف حاصل کیا۔ ان کی اہلیہ جیسیکا ڈیوِس نے نومبر میں ان کے دوسرے بیٹے کو جنم دیا۔ اس خوشی کے بعد ٹریوس کی زندگی اور کرکٹ میں نئی توانائی آئی اور وہ اس وقت بارڈر گواسکر ٹرافی میں شاندار پرفارمنس دے رہے ہیں۔

آخر میں، ہندوستانی کرکٹر سرفراز خان کا بھی ذکر ضروری ہے جو 2024 میں والد بنے۔ سرفراز اور ان کی اہلیہ رومانہ ظہور نے 24 اکتوبر 2024 کو اپنے پہلے بچے کا استقبال کیا۔ سر فراز خان بھارتی کرکٹ ٹیم کا حصہ بننے سے پہلے ہی اپنی زبردست کارکردگی سے سب کی توجہ حاصل کر چکے ہیں اور اب ان کی زندگی میں ایک نیا باب شروع ہوا ہے۔

یہ سال کرکٹ کے میدان میں شاندار کارکردگی کے ساتھ ساتھ کھلاڑیوں کی ذاتی زندگی میں خوشیوں کا بھی پیغام لے کر آیا۔ ان پانچ کھلاڑیوں نے نہ صرف میدان میں کامیابیاں حاصل کی بلکہ والد بننے کے بعد اپنی زندگی میں ایک نئی خوشی کا اضافہ کیا۔