بی سی سی آئی نے جاری کی محمد شامی کی فٹنس رپورٹ، آسٹریلیا دورہ کی امیدیں ختم

بالآخر بورڈ آف کنٹرول فار کرکٹ ان انڈیا (بی سی سی آئی) نے تیز گیند باز محمد شامی کی فٹنس کے حوالے سے آفیشل اپڈیٹ جاری کر دیا ہے۔ کچھ روز قبل بنگلورو میں واقع نیشنل کرکٹ اکیڈمی (این سی اے) میں ان کی فٹنس کی جانچ کی گئی تھی۔ جانچ میں پایا گیا ہے کہ محمد شامی ابھی پورے طور پر فٹ نہیں ہوئے ہیں۔ بی سی سی آئی کی میڈیکل ٹیم نے پایا کہ محمد شامی کے گھٹنے کی چوٹ کو ٹھیک ہونے میں ابھی وقت لگے گا۔ بورڈ نے یہ بھی واضح کر دیا ہے کہ محمد شامی بارڈر-گواسکر ٹرافی کے آخری 2 ٹیسٹ میچوں میں بھی نہیں کھیل پائیں گے۔

تیز گیند باز محمد شامی کو ابھی بائیں گھٹنے میں سوجن کا مسئلہ ہے جس کی وجہ سے انہیں اپنی گیند بازی ورک لوڈ کو مینیج کرنا ہوگا۔ رپورٹ میں جانکاری دی گئی ہے کہ یہ سوجن انہیں کافی عرصے کے بعد طویل گیند بازی اسپیل ڈالنے کے دوران آئی ہے۔ واضح ہو کہ محمد شامی نے رنجی ٹرافی میں مدھیہ پردیش کے خلاف میچ کے دوران بنگال کی جانب سے 43 اوور کی گیند بازی کی تھی۔ بی سی سی آئی کے سینٹر آف ایکسی لینس میں محمد شامی فی الحال میڈیکل اسٹاف کی صلاح پر اپنی مضبوطی اور کنڈیشننگ کو بہتر کرنے کے لیے کام کرتے رہیں گے۔

قابل ذکر ہے کہ محمد شامی نے کچھ ہفتے قبل ہی رنجی ٹرافی کے لیے بنگال کی ٹیم میں انجری کے تقریباً 1 سال بعد واپسی کی تھی۔ رنجی ٹرافی کے بعد انہوں نے سید مشتاق علی ٹرافی میں بھی شرکت کی تھی۔ اس کے بعد ایسا لگ رہا تھا کہ محمد شامی کو بارڈر-گواسکر ٹرافی کے آخری 2 میچوں میں شامل کیا جا سکتا ہے۔ اب جبکہ ان کا میڈیکل فٹنس ٹیسٹ ہوا تو پتہ چلا کہ کرکٹ کے لمبے فارمیٹ یعنی ٹیسٹ کھیلنے کے لیے محمد شامی کو ابھی اپنی فٹنس پر مزید توجہ دینے کی ضرورت ہے۔ حالانکہ 21 دسمبر سے شروع ہوئے وجے ہزارے ٹرافی میں محمد شامی اب تک کھیلتے ہوئے نظر نہیں آئے ہیں۔ ان تمام میں سب سے خوش آئند بات یہ ہے کہ محمد شامی کی ’ایڑی‘ کی چوٹ مکمل طور پر ٹھیک ہو گئی ہے۔ محمد شامی کو ایڑی کی بھی سرجری کرانی پڑی تھی۔