انگلینڈ دورہ کے لیے 18 رکنی ہندوستانی ٹیم کا اعلان، شبھمن گل بنے کپتان

کرکٹ شیدائیوں کو جس چیز کا بے صبری سے انتظار تھا، آج اس کا اعلان بی سی سی آئی نے کر دیا۔ ہندوستانی ٹیسٹ کرکٹ ٹیم کو ایک نیا کپتان بھی مل گیا اور انگلینڈ دورہ کے لیے 18 رکنی ٹیم کا اعلان بھی کر دیا گیا ہے۔ ٹیسٹ ٹیم کی قیادت شبھمن گل کو سونپی گئی ہے، اور اس طرح سے ہندوستانی ٹیسٹ کرکٹ کی تاریخ میں ایک نیا باب جڑ گیا ہے۔

ہندوستان کو انگلینڈ دورہ پر میزبان ٹیم کے ساتھ 5 ٹیسٹ میچوں کی سیریز کھیلنی ہے جو کہ 27-2025 ورلڈ ٹیسٹ چمپئن شپ سائیکل کا حصہ ہوگی۔ اس دورہ کے لیے بی سی سی آئی کے لیے ہندوستانی اسکواڈ کا اعلان آسان نہیں تھا، کیونکہ روہت شرما، وراٹ کوہلی اور روی چندرن اشون جیسے مایہ ناز کھلاڑیوں کے ریٹائرمنٹ سے ایک بڑا خلا پیدا ہو گیا ہے۔ پھر بھی جو ٹیم بی سی سی آئی نے منتخب کی ہے، اسے نئی شروعات دینے والا قرار دیا جا رہا ہے۔

اجیت اگرکر کی قیادت والی سلیکشن کمیٹی نے انگلینڈ دورہ کے لیے ایک نوجوان ٹیم کا انتخاب کیا ہے۔ یشسوی جیسوال اور ابھیمنیو ایشورن سلامی بلے بازی کی ذمہ داری سنبھال سکتے ہیں۔ سائی سدرشن اور کرون نایر کو مڈل آرڈر میں جگہ دی گئی ہے، جو کوہلی کی غیر موجودگی میں نمبر 4 کی پوزیشن بھر سکتے ہیں۔ رشبھ پنت کو نائب کپتان بنایا گیا ہے اور وہ وکٹ کیپنگ کے ساتھ ساتھ مڈل آرڈر میں اہم کردار نبھائیں گے۔ دھرو جوریل کا انتخاب دوسرے وکٹ کیپر کی شکل میں ہوا ہے۔

تیز گیندباز عرشدیپ سنگھ بھی اس بار ٹیسٹ ٹیم کا حصہ بنائے گئے ہیں۔ یہ پہلا موقع ہے جب وہ ٹیسٹ ٹیم کا حصہ بنے ہیں۔ ان کے علاوہ شاردل ٹھاکر بھی 18 رکنی اسکواڈ میں جگہ بنانے میں کامیاب ہوئے ہیں۔ اس ٹیم میں ایک حیران کرنے والی بات ضرور نظر آ رہی ہے، اور وہ یہ کہ محمد سمیع کو جگہ نہیں ملی ہے۔ علاوہ ازیں سرفراز خان بھی 18 رکنی اسکواڈ کا حصہ نہیں ہے۔ حالانکہ امید کی جا رہی تھی کہ سرفراز خان کو انگلینڈ دورہ میں موقع دیا جائے گا۔ بہرحال، جسپریت بمراہ کے علاوہ محمد سراج، پرشدھ کرشنا اور آکاش دیپ جیسے اہم گیندبازوں کو ٹیم میں شامل کیا گیا ہے۔

انگلینڈ دورہ کے لیے 18 رکنی ہندوستانی ٹیم:

شبھمن گل (کپتان)، رشبھ پنت (وکٹ کیپر، نائب کپتان)، یشسوی جیسوال، کے ایل راہل، سائی سدرشن، ابھیمنیو ایشورن، کرون نایر، نتیش ریڈی، رویندر جڈیجہ، دھرو جوریل (وکٹ کیپر)، واشنگٹن سندر، شاردل ٹھاکر، جسپریت بمراہ، محمد سراج، پرشدھ کرشنا، آکاش دیپ، عرشدیپ سنگھ، کلدیپ یادو۔