جنرل نرونے کی ‘غیر مطبوعہ‘ کتاب کا خوف...اے جے پربل

راہل گاندھی نے لوک سبھا میں 2 فروری کو جیسے ہی اپنی تقریر شروع کی، ایوان میں معمول کی خاموشی تھی۔ بمشکل دو منٹ گزرے ہوں گے کہ وزیر دفاع راجناتھ سنگھ اپنی نشست سے کھڑے ہو گئے۔ اپوزیشن لیڈر اس وقت سابق فوجی سربراہ جنرل منوج مکند نرونے کی یادداشتوں پر مبنی ایک مضمون کی چند سطریں پڑھ رہے تھے۔ جیسے ہی انہوں نے اقتباس شروع کیا، حکمراں بنچوں میں بے چینی صاف نظر آنے لگی۔

راہل گاندھی نے کہا، ’’جب چار چینی ٹینک ہندوستانی علاقے میں داخل ہوئے تو جنرل لکھتے ہیں…‘‘ وہ اتنا ہی کہہ پائے تھے کہ وزیر اعظم نریندر مودی اور وزیر داخلہ امت شاہ کے ساتھ بیٹھے راجناتھ سنگھ نے مداخلت کرتے ہوئے کہا کہ ایسی کوئی کتاب موجود ہی نہیں ہے۔ انہوں نے اسپیکر سے مطالبہ کیا کہ بغیر ثبوت کے حوالہ دینے کی اجازت نہ دی جائے۔

اگلے دس منٹ کے دوران راجناتھ سنگھ کم از کم چار مرتبہ کھڑے ہوئے اور یہی بات دہراتے رہے کہ جس کتاب کا حوالہ دیا جا رہا ہے، وہ کبھی شائع ہی نہیں ہوئی۔ اگر راہل گاندھی کے پاس کتاب موجود ہے تو وہ اس کی ایک نقل ایوان میں پیش کریں۔ ان کا کہنا تھا کہ ایسی کسی کتاب کا وجود نہیں ہے۔

راہل گاندھی نے اس پر توجہ دی اور 4 فروری کو وہ کتاب کی ایک نقل اپنے ساتھ لے کر آئے۔ کیمروں کے سامنے اسے دکھاتے ہوئے انہوں نے کہا، ’’ہندوستان کے ہر نوجوان کو یہ دیکھنا چاہیے کہ یہ کتاب موجود ہے۔‘‘

کانگریس کے رکن کے سی وینوگوپال نے اسپیکر کی توجہ اس بات کی طرف دلائی کہ اپوزیشن لیڈر دراصل فروری 2026 میں ’کارواں‘ میگزین میں شائع ہونے والے سوشانت سنگھ کے مضمون ’نرونیز مومینٹ آف ٹروتھ‘ سے اقتباس پڑھ رہے تھے۔ اس پر امت شاہ نے جواب دیا کہ میگزین کچھ بھی شائع کر سکتے ہیں، اگر کتاب شائع ہی نہیں ہوئی تو اسے کیسے نقل کیا جا سکتا ہے؟ راہل گاندھی کے اس اصرار کے باوجود کہ مواد ’سو فیصد درست‘ ہے، اسپیکر اوم برلا نے ان کی بات مسترد کر دی۔ وزیر دفاع نے کہہ دیا کہ کتاب موجود نہیں، اور معاملہ وہیں ختم کر دیا گیا۔

لیکن حقیقت یہ تھی کہ جنرل نرونے کی کتاب ’فور اسٹارز آف ڈیسٹنی‘ کو پینگوئن رینڈم ہاؤس نے اپنی فہرست میں شامل کیا تھا۔ اشاعت کی تاریخ 30 اپریل 2024 درج تھی۔ صفحات کی تعداد 448، وزن 650 گرام اور آئی ایس بی این نمبر 10-0670099759 اور 13-978-0670099 درج تھا۔ اسے ایمیزون اور فلپ کارٹ جیسے آن لائن پلیٹ فارمز پر بھی فہرست کیا گیا تھا۔

تاہم یہ تمام آن لائن نشانات 48 گھنٹوں سے بھی کم وقت میں ہٹا دیے گئے۔ جب راہل گاندھی نے طباعت شدہ نقل ایوان میں دکھائی تو انہوں نے حکومت کو چیلنج کیا کہ اگر وزیر اعظم ایوان میں آتے ہیں تو وہ انہیں یہ کتاب پیش کرنا چاہیں گے۔ انہوں نے کہا کہ وزیر داخلہ اور وزیر دفاع دونوں نے دعویٰ کیا تھا کہ کتاب شائع نہیں ہوئی لیکن یہ رہی اس کی نقل۔

جس مضمون کے اقتباس کو پڑھنے سے انہیں روکا گیا تھا، وہ ایک ایسے حصے سے شروع ہوتا ہے جسے پریس ٹرسٹ آف انڈیا نے دسمبر 2023 میں جاری کیا تھا اور جسے 18 دسمبر 2023 کو ’دی پرنٹ‘ نے شائع کیا تھا۔ اس کی تفصیلات گزشتہ دو برس سے عوامی سطح پر دستیاب تھیں۔ اس کے باوجود حکومت نے پارلیمنٹ میں اسے دبانے کی پوری کوشش کی۔

راہل گاندھی نے سوال اٹھایا، ’’اس میں ایسا کیا لکھا ہے جس سے یہ لوگ اتنے خوف زدہ ہیں؟ اگر وہ خوف زدہ نہیں ہیں تو مجھے اسے پڑھنے کیوں نہیں دیتے؟‘‘

واقعی سوال یہی ہے کہ آخر کیوں؟

جنرل منوج مکند نرونے دسمبر 2019 سے اپریل 2022 تک ہندوستانی فوج کے سربراہ رہے۔ اسی عرصے میں مشرقی لداخ میں چینی دراندازی ہوئی اور گلوان وادی میں ہندوستانی اور چینی فوجیوں کے درمیان جھڑپیں ہوئیں، جن میں 20 ہندوستانی فوجی مارے گئے۔ یہ وہ وقت تھا جب جنرل بپن راوت ملک کے پہلے چیف آف ڈیفنس اسٹاف مقرر ہوئے تھے اور تینوں مسلح افواج کی ہم آہنگی ان کی ذمہ داری تھی۔

یہ ایک نہایت حساس مرحلہ تھا۔ مشرقی لداخ میں چین کی پیش قدمی ہوئی اور کچھ علاقے ہاتھ سے نکل گئے، جسے حکومت نے تسلیم بھی کیا۔ اسی دوران اگنی پتھ منصوبہ شروع کیا گیا، جس کے بارے میں نرونے لکھتے ہیں کہ فوج نے اچانک متعارف کرائے جانے پر اعتراض کیا تھا۔

ییل یونیورسٹی میں لیکچرار اور ’کارواں‘ کے کنسلٹنگ ایڈیٹر سوشانت سنگھ، جو خود سابق فوجی افسر ہیں، نے نرونے کی ٹائپ شدہ نسخہ کی بنیاد پر اپنا مضمون تحریر کیا۔ وہ لکھتے ہیں کہ یہ یادداشتیں چینی جارحیت، ان فیصلوں پر روشنی ڈالتی ہیں جن کے نتیجے میں فوجیوں کی جانیں گئیں اور علاقہ ہاتھ سے نکلا، اور ایسے وقت میں سیاسی جوابدہی کی کمی کو اجاگر کرتی ہیں جب ملک جنگ کے دہانے پر تھا۔

سوشانت سنگھ کے مطابق 31 اگست 2020 کو رات 8 بج کر 15 منٹ پر آرمی چیف کو شمالی کمان کے سربراہ لیفٹیننٹ جنرل وائی کے جوشی کا فون آیا۔ گلوان کی جھڑپ کو گیارہ ہفتے گزر چکے تھے۔ لائن آف ایکچوئل کنٹرول پر مذاکرات جاری تھے۔ این ایس اے اجیت ڈوبھال کی سربراہی میں چین اسٹڈی گروپ کی کئی میٹنگیں ہو چکی تھیں۔

نرونے لکھتے ہیں کہ اس بات پر اتفاق تھا کہ ہندوستان کو کچھ کرنا ہوگا۔ تاہم انہیں ہدایت تھی کہ جب تک “اوپر سے” اجازت نہ ملے، گولی نہ چلائی جائے۔ فوج نے اس پابندی پر اعتراض کیا۔ گلوان کے تجربے کے بعد فوج چاہتی تھی کہ اشتعال کی صورت میں کارروائی کی آزادی ہو۔ بالآخر یہ طے ہوا کہ اگر ذاتی سلامتی کو خطرہ ہو تو متعلقہ دستہ آخری چارہ کار کے طور پر خود دفاع میں گولی چلا سکتا ہے۔

اسی رات اطلاع ملی کہ کیلاش رینج کے راچن لا کی طرف چار چینی ٹینک بڑھ رہے ہیں۔ ہندوستانی فوج نے وارننگ فلیئرز چلائے، مگر انہیں نظر انداز کیا گیا۔ ہندوستان کو بلندی، توپ خانے اور بھاری ٹینکوں کی برتری حاصل تھی۔ جنرل جوشی نے آگے بڑھتے چینی ٹینکوں کو روکنے کے لیے فائرنگ کی اجازت طلب کی۔

نرونے نے سی ڈی ایس جنرل بپن راوت، دفاعی وزیر راجناتھ سنگھ، این ایس اے اجیت ڈوبھال اور وزیر خارجہ ایس جے شنکر سے رابطہ کیا اور پوچھا: “میرے لیے کیا حکم ہے؟”

پی ٹی آئی کے جاری کردہ اقتباس اور ’کارواں‘ کے مضمون کے مطابق، انہیں رات 10 بج کر 30 منٹ تک انتظار کرنا پڑا۔ تب دفاعی وزیر نے فون کر کے وزیر اعظم کا پیغام دیا: “جو مناسب سمجھو، وہ کرو۔”

نرونے لکھتے ہیں کہ انہیں ایک مشکل ذمہ داری سونپی گئی۔ مکمل اختیار کے ساتھ ساری ذمہ داری ان پر ڈال دی گئی تھی۔ انہوں نے فیصلہ کیا کہ ہندوستان پہلی گولی نہیں چلائے گا، مگر بھاری ٹینک اس انداز میں تعینات کیے جائیں کہ ان کی توپوں کا رخ چینی ٹینکوں کی طرف ہو۔

اگر اتنے اہم لمحے میں وزیر اعظم دو گھنٹے سے زائد دستیاب نہیں تھے، تو سوال اٹھتا ہے کہ فیصلہ سازی کا نظام کیسے کام کر رہا تھا؟ قومی سلامتی کے معاملات میں وزیر اعظم تک رابطہ ہر وقت ممکن ہوتا ہے۔ پھر 31 اگست 2020 کی شام کیا ہوا تھا؟

3 فروری کو لوک سبھا میں راجناتھ سنگھ نے کہا کہ نرونے کی کتاب کو “حقائق کی غلطیوں” کے باعث منظوری نہیں دی گئی تھی۔ اس بیان نے معاملہ مزید پیچیدہ کر دیا۔ اگر کتاب کو منظوری نہیں ملی تھی تو کیا اسے چھاپا جا سکتا تھا؟ کیا اسے آن لائن پیشگی آرڈر کے لیے فہرست کیا جا سکتا تھا؟ اگر شائع نہیں ہوئی تو اس کی طباعت شدہ نقل کہاں سے آئی؟

نرونے نے اکتوبر 2025 میں ایک ادبی میلے میں کہا تھا کہ انہوں نے اپنا کام مکمل کر کے مسودہ پبلشر کو دے دیا تھا۔ پبلشر کو وزارت دفاع سے اجازت لینا تھی اور مسودہ جائزے میں تھا۔ ایک سال سے زیادہ عرصہ گزر چکا تھا۔ ہندوستان میں حاضر سروس اور ریٹائرڈ فوجی افسران کو کتاب شائع کرنے سے پہلے منظوری لینا ضروری ہوتا ہے۔ آپریشنل امور سے متعلق کتابوں کی تین سطحوں پر جانچ ہوتی ہے: آرمی ہیڈکوارٹر، وزارت دفاع اور کیبنٹ سیکریٹریٹ۔

لیفٹیننٹ جنرل کے جے ایس ‘ٹائنی’ ڈھلوں نے ایک انٹرویو میں کہا کہ اگر اعتراض نہ ہو تو منظوری مل جاتی ہے؛ اگر اعتراض ہو تو مصنف کو وضاحت اور ترمیم کا موقع دیا جاتا ہے؛ اور اگر قومی سلامتی متاثر ہو تو منظوری نہیں دی جاتی۔ سوال یہ ہے کہ اگر کتاب میں صرف “حقائق کی غلطیاں” تھیں تو کیا انہیں درست کر کے شائع نہیں کیا جا سکتا تھا؟

“جو مناسب سمجھو، وہ کرو” بظاہر مکمل اختیار دینے کا جملہ ہے، لیکن اس کا ایک مطلب سیاسی ذمہ داری سے دستبرداری بھی ہو سکتا ہے۔ حکومت قومی سلامتی کے معاملات میں سب سے بڑی پالیسی ساز کمیٹی، کیبنٹ کمیٹی برائے سلامتی، کی میٹنگ بلا کر واضح ہدایت دینے کی ذمہ دار تھی۔ فیصلہ جنرل نرونے پر چھوڑ دینا اور بعد میں اس کی ملکیت سے انکار کرنا سیاسی طور پر سہل راستہ ہو سکتا ہے، مگر کیا یہ قیادت کا مظاہرہ ہے؟

یہ محض ایک کتاب کا معاملہ نہیں ہے۔ یہ شفافیت، جوابدہی اور جمہوری عمل کی ساکھ کا سوال ہے۔ اگر کتاب میں کوئی ایسا مواد نہیں جو قومی سلامتی کو نقصان پہنچائے تو اسے منظر عام پر آنے سے کیوں روکا جا رہا ہے؟ اور اگر اس میں اہم انکشافات ہیں تو کیا عوام کو سچ جاننے کا حق نہیں؟ اصل سوال بدستور قائم ہے کہ اگر کتاب موجود نہیں، تو پھر اس سے خوف کیوں؟