آر بی آئی کی مانیٹری پالیسی کمیٹی کا سہ روزہ اجلاس شروع، معیشت کو مستحکم کرنے اور مہنگائی پر قابو پانے پر توجہ

نئی دہلی: ریزرو بینک آف انڈیا (آر بی آئی) کی مانیٹری پالیسی کمیٹی (ایم پی سی) کا سہ روزہ اجلاس بدھ سے شروع ہو گیا۔ اس اجلاس میں معیشت کو مضبوط بنانے اور مہنگائی کو کنٹرول میں رکھنے پر غور کیا جا رہا ہے۔ تجزیہ کاروں کے مطابق، مرکزی بینک ریپو ریٹ کو 6.5 فیصد پر برقرار رکھ سکتا ہے، جو سابقہ 9 اجلاسوں سے غیر تبدیل ہے۔

مالی سال 2025 کی دوسری سہ ماہی میں جی ڈی پی کی شرح نمو 5.4 فیصد رہی، جبکہ اکتوبر میں صارف قیمت انڈیکس (سی پی آئی) کی شرح 6.21 فیصد تک پہنچ گئی، جو آر بی آئی کے 4.8 فیصد کے اندازے سے زیادہ تھی۔ ایم کے گلوبل فنانشل سروسز کی رپورٹ کے مطابق، آر بی آئی مہنگائی کے اندازے میں اضافہ اور شرح نمو کے اندازے میں کمی کر سکتا ہے۔ اس صورتحال میں ریپو ریٹ میں کمی کا امکان نہیں ہے۔

بجاج بروکنگ ریسرچ نے کہا کہ آر بی آئی کا مقصد مہنگائی کو کنٹرول کرتے ہوئے معاشی ترقی کو برقرار رکھنا ہے۔ بروکریج رپورٹ میں مزید کہا گیا، ’’ہندوستان کی جی ڈی پی مضبوط ہے۔ اس لیے ترقی اور مہنگائی کے درمیان پالیسی توازن ضروری ہوگا۔ نیوٹرل پالیسی نقطہ نظر ایک متوازن معیشت کی عکاسی کرے گا۔‘‘

یہ ایم پی سی اجلاس مالی سال 2024-25 کا پانچویں اجلاس ہے۔ سابقہ اجلاس میں ریپو ریٹ کو 6.5 فیصد پر برقرار رکھا گیا اور پالیسی کا موقف ’نیوٹرل‘ رکھا گیا تھا۔

آر بی آئی نے فروری 2023 میں ریپو ریٹ میں آخری بار 0.25 فیصد کا اضافہ کیا تھا، جس کے بعد سے یہ شرح تبدیل نہیں ہوئی۔ ماہرین اور مارکیٹ کے تجزیہ کار اس میٹنگ کے نتائج کا باریک بینی سے مشاہدہ کریں گے، کیونکہ یہ معیشت اور مہنگائی کے درمیان پیچیدہ توازن کو سنبھالنے کے لیے آر بی آئی کے اقدامات کا تعین کرے گا۔