مدھیہ پردیش: کانگریس پارٹی کا بجلی کے فرضی بلوں کے خلاف ’پول کھول مہم‘ چلانے کا اعلان

بھوپال: مدھیہ پردیش کانگریس کے شعبہ ذرائع ابلاغ کے نائب صدر بھوپیندر گپتا نے ریاست بھر میں بجلی کے بلوں میں دھوکہ دہی کا الزام لگاتے ہوئے کہا ہے کہ اس کی جانچ ہونی چاہئے ورنہ پارٹی اس کے خلاف پول کھول مہم شروع کرے گی۔

اپنے بیان میں بھوپیندر گپتا نے کہا کہ مدھیہ پردیش کی بجلی کمپنیاں ایسے لاکھوں صارفین کے نام پر مسلسل بل بنا رہی ہیں، جن کے میٹر اکھڑ گئے ہیں یا جن کی دکانیں برسوں سے بند پڑی ہوئی ہیں۔ انہوں نے دعویٰ کیا کہ توانائی کے وزیر پردومن سنگھ تومر نے خود فرضی بلنگ کی حقیقت کو قبول کیا ہے۔

انہوں نے کہا کہ اس طرح کے جعلی بل لاکھوں کی تعداد میں بن رہے ہیں لیکن انہیں روکا نہیں جا رہا ہے۔ انہوں نے اس کی تفصیلی تحقیقات کا مطالبہ کیا ہے۔ انہوں نے کہا کہ اگر اسے نہیں روکا گیا تو کانگریس اس کے خلاف مہم چلائے گی۔

خیال رہے کہ مدھیہ پردیش میں بجلی کمپنوں کی جانب سے صارفین کو جو بل دیئے جا رہے ہیں ان میں بڑے پیمانے پر بےضابطگیاں پائی جا رہی ہیں۔ حال ہی میں راجدھانی بھوپال کے ایک صارف کو 2.58 لاکھ روپے کا بل تھمایا گیا تھا جبکہ اس کا ماہانہ بل صرف 300 سے 500 روپے تک کا آتا ہے۔

رپورٹ کے مطابق بڑے پیامنے پر بے ضابطگی ہونے پر کمپنی بل میں ترمیم بھی کر دیتی ہے لیکن صارفین کو بلا وجہ دفاتر کے چکر لگانے پڑتے ہیں۔ جبکہ کمپنی بل میں تھوڑا اضافہ کیا جاتا ہے تو صارفین اسے معمولی مان کر جمع بھی کر دیتے ہیں۔ اس عمل میں بجلی کمپنیوں کو لاکھوں روپے کا فائدہ ہوتا ہے۔

(یو این آی ان پٹ کے ساتھ)