مہنگائی سے باورچی خانے میں لگی آگ، مسلسل تیسرے مہینے گیس سلنڈر کی قیمتوں میں اضافہ

نئی دہلی: ملک میں رسوئی گیس کی قیمت میں مسلسل تیسرے ماہ اضافہ ہوا ہے اور یکم مئی سے قومی راجدھانی دہلی میں سبسڈی والا گھریلو گیس سلنڈر 28 پیسے اور بغیر سبسڈی والا چھ روپے مہنگا ہو گیا۔

ملک کی سب سے بڑی تیل کمپنی انڈین آئل کارپوریشن سے ملنے والی اطلاعات کے مطابق بدھ سے دہلی میں سبسڈی والا 14.2 کلو گرام کا گیس سلنڈر 496.14 روپے کا ہو گیا، اپریل میں اس کی قیمت 495.86 روپے تھی، بغیر سبسڈی والے گھریلو گیس سلینڈر کی قیمت 706.50 روپے سے بڑھ کر 712.50 روپے ہو گئی۔

کولکاتا، ممبئی اور چنئی میں بھی سبسڈی والا گیس سلنڈر 29 پیسے تک اور بغیر سبسڈی والا چھ روپے مہنگا ہوا ہے۔ فروری کے بعد یہ مسلسل تیسرا مہینہ ہے جب رسوئی گیس مہنگی ہوئی ہے۔

کولکاتا میں سبسڈی والا گیس سلنڈر اب 499 روپے کی بجائے 499.29 روپے، ممبئی میں 493.57 روپے کی بجائے 493.86 روپے اور چنئی میں 483.74 روپے کی بجائے 484.02 روپے میں مل رہا ہے۔

بغیر سبسڈی والا گیس سلنڈر آج سے کولکاتا میں 738.50 روپے، ممبئی میں 684.50 روپے اور چنئی میں 728 روپے کا مل رہا ہے۔

واضح رہے کہ اس سے قبل اپریل کے مہینے کی شروعات میں بھی ایل پی جی سلنڈر کی قیمتوں میں اضافہ کیا گیا تھا۔ گزشتہ یکم اپریل کو غیر سبسڈی والے ایل پی جی سلنڈر کی قیمتوں میں 5 روپے کا اضافہ کیا گیا تھا جبکہ سبسڈی والے ایل پی جی سلنڈر پر 25 پیسے کا اضافہ کیا گیا تھا۔ اس سے قبل فروری کے مہینے میں سبسڈی والے ایل پی جی سلنڈر پر 2.08 روپے کا اضافہ ہوا تھا جبکہ غیر سبسڈی والا ایل پی جی سنڈر 42.50 مہنگا ہوا تھا۔

(یو این آئی ان پٹ کے ساتھ)