عالمی غیر یقینی صورتحال کے دوران سونے کی قیمتوں میں ریکارڈ اضافہ

ممبئی: امریکی صدر ڈونلڈ ٹرمپ کے دورِ اقتدار میں پالیسی کی غیر یقینی صورتحال کے سبب مارکیٹ میں تشویش برقرار ہے، جس کے نتیجے میں سونے کی قیمتوں میں مسلسل آٹھویں دن اضافہ ریکارڈ کیا گیا۔ قومی دارالحکومت میں سونے کی قیمت 200 روپے کے اضافے کے ساتھ پہلی بار 83,000 روپے فی 10 گرام سے تجاوز کر گئی۔

آل انڈیا صرافہ ایسوسی ایشن کے مطابق، 99.9 فیصد خالصیت کا سونا جمعہ کو 83,100 روپے فی 10 گرام کی نئی بلند ترین سطح پر پہنچ گیا۔ یہ قیمت جمعرات کو 82,900 روپے پر تھی۔ عالمی سطح پر بھی سونے کی قیمتیں جمعہ کو تین ماہ کی بلند ترین سطح 2780 ڈالر فی اونس تک پہنچ گئیں، اور یہ مسلسل چوتھے ہفتے اضافہ ریکارڈ ہوا ہے۔

ماہرین کے مطابق، سونے کی قیمتوں میں اضافے کی اہم وجوہات میں عالمی سطح پر طلب میں اضافہ اور مثبت معاشی اشارے شامل ہیں۔ ماہرین کا کہنا ہے کہ امریکی صدر ٹرمپ کی تجارتی پالیسیوں کے حوالے سے غیر یقینی اور محفوظ سرمایہ کاری کی طرف جھکاؤ سونے کی مانگ میں اضافے کا سبب بن رہا ہے۔

رٹیل بروکنگ اور ڈسٹریبیوشن کے سی ای او سندیپ رائے چورا نے کہا، ’’مارکیٹ ٹرمپ کے ٹویٹس کے منتظر ہیں، اور اس دوران سونا معمولی اوپر کے رجحان کے ساتھ ایک مخصوص حد میں برقرار رہ سکتا ہے۔‘‘

آگمنٹ گولڈ میں تحقیق کی سربراہ ڈاکٹر رینیشا چینانی نے کہا کہ "اگر سونے کی قیمتیں 2,750 ڈالر (79,100 روپے) سے اوپر برقرار رہیں، تو رواں ہفتے ہم 2800 ڈالر (80,500 روپے) کی طرف مزید اضافہ دیکھ سکتے ہیں۔‘‘ 23 جنوری کو قومی دارالحکومت میں سونے کی قیمتیں 82,900 روپے فی 10 گرام کے نئے ریکارڈ سطح پر پہنچیں۔