سونے کی قیمتوں میں 3 ہفتوں کی تیزی کے بعد کمی، 24 کیرٹ 12785 روپے فی گرام

بین الاقوامی بازاروں میں مسلسل تیزی کے درمیان ہندوستان میں گزشتہ چند دنوں سے سونے کی قیمتوں میں زبردست اضافہ دیکھا جا رہا تھا۔ امریکہ میں ممکنہ حکومتی شٹ ڈاؤن اور اس کے نتیجے میں پیدا ہونے والی معاشی بے یقینی نے عالمی سطح پر سرمایہ کاروں کو محفوظ اثاثوں کی طرف راغب کیا ہے، جس کا براہِ راست اثر قیمتی دھاتوں خصوصاً سونے کی قیمتوں پر پڑا۔ گزشتہ پانچ دنوں میں صرف 24 کیرٹ سونے کی قیمت میں تقریباً 6,630 روپے فی 10 گرام کا اضافہ ریکارڈ کیا گیا، جسے گزشتہ تین ہفتوں کا سب سے بلند سطح قرار دیا جا رہا ہے۔ اسی مدت میں چاندی کی قیمتوں میں بھی اضافہ ہوا۔

تاہم جمعے کے دن، جب بہار اسمبلی انتخابات کے نتائج آ رہے تھے، سونے کی قیمتوں میں معمولی کمی ریکارڈ کی گئی۔ آج 24 کیرٹ سونا 80 روپے کی کمی کے ساتھ 12,785 روپے فی گرام پر پہنچ گیا، جو جمعرات کے مقابلے میں قدرے کم ہے۔ اسی طرح 22 کیرٹ سونے کی قیمت 70 روپے گر کر 11,720 روپے فی گرام ہو گئی ہے۔ اگر 18 کیرٹ کی بات کریں تو اس میں بھی 58 روپے کی کمی ہوئی اور یہ 9,589 روپے فی گرام پر آ گیا۔ اس حساب سے آج 10 گرام 24 کیرٹ سونا 800 روپے سستا ہوا، جبکہ 22 کیرٹ میں 700 روپے اور 18 کیرٹ میں 580 روپے کی کمی درج کی گئی۔

ہندوستان کے مختلف شہروں میں آج سونا کس قیمت پر فروخت ہو رہا ہے، اس کی تفصیلات بھی سامنے آئی ہیں۔ ممبئی، کولکاتا، حیدرآباد، بنگلورو، کیرالہ، پونے، وجے واڑا، ناگپور اور بھوبنیشور میں آج 24 کیرٹ سونا 12,785 روپے فی گرام جبکہ 22 کیرٹ سونا 11,720 روپے فی گرام میں دستیاب ہے۔

دہلی، جے پور، چنڈی گڑھ اور ایودھیا میں 24 کیرٹ سونے کی قیمت 12,800 روپے فی گرام جبکہ 22 کیرٹ سونا 11,735 روپے فی گرام فروخت ہو رہا ہے۔ چنئی، مدورائی، سیلم اور تریچی میں 24 کیرٹ سونا 12,916 روپے اور 22 کیرٹ سونا 11,840 روپے فی گرام ہے۔ اسی طرح وڈودرا، احمد آباد، پٹنہ، سورت اور راجکوٹ میں 24 کیرٹ سونا 12,790 روپے جبکہ 22 کیرٹ 11,725 روپے فی گرام دستیاب ہے۔

چاندی کی قیمتوں میں آج کوئی تبدیلی نہیں دیکھی گئی۔ ملک بھر میں چاندی 173.10 روپے فی گرام اور 1,73,100 روپے فی کلوگرام میں فروخت ہو رہی ہے، جو گزشتہ روز کی قیمت کے برابر ہے۔ چاندی کی اس استحکام کو ماہرین عالمی مارکیٹ کی محتاط ٹریڈنگ اور سرمایہ کاروں کی درمیانی سطح کی دلچسپی سے جوڑ رہے ہیں۔

معاشی ماہرین کا کہنا ہے کہ آئندہ چند دنوں میں سونے کی قیمتیں عالمی حالات خصوصاً امریکی معیشت، مشرقِ وسطیٰ کی صورتحال اور ڈالر کی سطح کے مطابق اتار چڑھاؤ کا شکار رہ سکتی ہیں۔ فی الحال مقامی خریدار قیمتوں میں معمولی کمی کو خریداری کا موقع سمجھ رہے ہیں، لیکن مارکیٹ میں مجموعی فضا اب بھی احتیاط پر مبنی ہے۔