جب دھرمیندر نے مسلم خاندان کو حج پر بھیجنے میں مدد کی...

فلم شعلے کے ’ویرو‘ اداکار دھرمیندر نے ایک لمبے وقت تک ہندوستانی خواتین کے دل پر راج کیا ہے۔ اپنے وقت کے سب سے مقبو ل اداکار دھرمیندر اکثر اپنے ٹوئٹر اکاؤنٹ پر اپنی یا دیں شئیر کرتے رہتے ہیں۔ حال ہی میں انہوں نے ایک تصویر کے ساتھ اپنی زندگی کا ایک قصہ شئیر کیا ہے، جس کے بعد ان کی خوب پذیرائی ہو رہی ہے۔

دھرمیندر نے ایک تصویر شیئر کرتے ہوئے بتایا کہ فلموں سے پہلے وہ پنجاب کے مالیر کوٹلہ میں کام کرتے تھے۔ وہاں کے رہائشی محمد الدین اور ان کی شریک حیات فاطمہ ان سے کافی لگاؤ رکھتے تھے۔ وہ حج پر جانا چاہتے تھے لیکن ان کے پاس اتنے پیسے نہیں تھے۔ دھرمیندر نے بتایا کہ جب وہ اداکار بن گئے اور اس قابل ہو گئے کہ ان کا حج پر جانے کا خواب پورا کر سکوں ۔ اس کے لئے انہوں نے خدا کا شکر ادا کیا ہے۔

دھرمیندر کے اس ٹوئٹ پر ان کے مداح خوب ستائش کر رہے ہیں۔ ایک صارف انبر واجپئی نے لکھا کہ ایک صاف دل کا مالک ہی کسی دوسرے کے خواب کو پورا کر سکتا ہے۔ ’لوگ اپنے خواب پورا کرتے کرتے زندگی بتا دیتے ہیں، دوسروں کے بارے میں سوچنے کی فرصت ہی کسے ہے۔آپ جیسے چند لوگ ہی اس (دھرتی) زمین پر ہیں جو اچھا کام کر رہے ہیں۔‘

شرون جے ونت نے لکھا، خدا کے بندے ایسے ہی کام کرتے رہیں گے۔ بھگوان آپ کو خوب پیار اور خوشیاں دے دھرم جی۔ ویسے دھرمیندر کی پرسنالٹی ہی ایسی ہے کہ کوئی بھی انہیں ملے تو ان کا فین ہو جاتا ہے۔ فروفیشنل دنیا کی بات کریں تو دھرمیندر 2018 میں ’یملا پگلا دیوانہ پھر سے‘ میں نظر آئے تھے، یہ ان کی ہٹ فلم ’یملا پگلا دیوانہ‘ کی تیسری قسط تھی۔ اس میں سنی دیول، بابی دیول اور دھرمیندر تینوں ایک ساتھ نظر آئے تھے۔ حال ہی میں انہوں نے اپنی بیوی ہیما مالنی اور بیٹےسنی دیول کے لئے انتخابی تشہیر کی تھی۔ ہیما مالنی اتر پردیش کے متھرا سے اور سنی دیول پنجاب کے گرداسپور سے بی جے پی کے ٹکٹ پر انتخابت لڑ رہے ہیں۔