’فلم کالا ہرن: دی بیٹل فار لیگیسی‘ کے خلاف سلمان خان کی عرضی پر سماعت ملتوی، یکم جولائی کی تاریخ مقرر

نئی دہلی: دہلی ہائی کورٹ نے اداکار سلمان خان کی جانب سے فلم ’کالا ہرن: دی بیٹل فار لیگیسی‘ کی نمائش پر روک لگانے کے مطالبے سے متعلق دائر عرضی پر سماعت ملتوی کرتے ہوئے یکم جولائی کی اگلی تاریخ مقرر کر دی ہے۔

جسٹس مدھو جین کی عدالت میں سماعت کے دوران فلم کے پروڈیوسروں کی طرف سے کہا گیا کہ انہیں سلمان خان کی جانب سے داخل کی گئی عرضی کی مکمل نقل ابھی تک موصول نہیں ہوئی ہے۔ ان کے مطابق انہیں صرف ایک درخواست کی نقل فراہم کی گئی ہے، جس کے باعث مناسب جواب داخل کرنا ممکن نہیں ہو سکا۔

اس پر عدالت نے سلمان خان کے وکیل کو ہدایت دی کہ وہ اس بات کو یقینی بنائیں کہ مخالف فریق کو عرضی کی مکمل نقل فراہم کی جائے تاکہ آئندہ سماعت کے دوران تمام فریقین اپنی اپنی بات مؤثر انداز میں عدالت کے سامنے رکھ سکیں۔ اس سے قبل عدالت نے فلم کے پروڈیوسر امت جانی، جانی فائر فاکس فلمز، ہدایت کار بھارت شرینیت، اکشے پانڈے اور اس منصوبے سے وابستہ دیگر افراد کو نوٹس جاری کرتے ہوئے ان سے جواب طلب کیا تھا۔

یہ تنازعہ فلم ’کالا ہرن: دی بیٹل فار لیگیسی‘ سے متعلق ہے، جسے سلمان خان سے وابستہ مشہور کالے ہرن کے شکار کے مقدمے سے متاثر قرار دیا جا رہا ہے۔ سلمان خان کا مؤقف ہے کہ فلم میں ان کے نام، شخصیت، انداز اور عوامی شناخت سے ملتے جلتے عناصر استعمال کیے گئے ہیں، جبکہ اس کے لیے ان سے کسی قسم کی اجازت حاصل نہیں کی گئی، جو ان کے شخصی حقوق کی خلاف ورزی ہے۔

عرضی میں کہا گیا ہے کہ فلم کے پوسٹر اور تشہیری مواد میں ایسے عناصر شامل ہیں جو براہ راست سلمان خان کی شناخت سے مشابہت رکھتے ہیں۔ اسی بنیاد پر انہوں نے عدالت سے درخواست کی ہے کہ فلم کی نمائش، تشہیری مہم اور مستقبل میں ڈیجیٹل پلیٹ فارموں پر اس کی پیش کش پر بھی روک لگائی جائے۔

فلم کے ابتدائی منظر اور تشہیری ویڈیو میں مرکزی کردار کا نام ایان خان رکھا گیا ہے، جسے اداکار کاشف اقبال خان نبھا رہے ہیں۔ ناظرین کی ایک بڑی تعداد نے ان کے لباس، چال ڈھال اور انداز کو سلمان خان سے مشابہ قرار دیا ہے۔ سوشل میڈیا پر بھی اس حوالے سے مختلف آرا سامنے آ رہی ہیں، جبکہ عدالت میں اس معاملے کی اگلی سماعت یکم جولائی کو ہوگی۔