عامر خان کی ’ستارے زمین پر‘ کی زبردست کمائی، پہلے ہفتے میں 89 کروڑ کا ہندسہ عبور

عامر خان کی فلم ’ستارے زمین پر‘ نے باکس آفس پر شاندار کارکردگی کے ساتھ اپنا پہلا ہفتہ مکمل کر لیا ہے۔ فلم کو نہ صرف ناظرین کی بھرپور پذیرائی حاصل ہو رہی ہے بلکہ اس نے کمائی کے معاملے میں کئی پرانی فلموں کے ریکارڈز بھی توڑ دیے ہیں۔ فلم میں عامر خان کے ساتھ 10 نئے اداکاروں کی بہترین اداکاری بھی ایک بڑی وجہ ہے جس کے باعث یہ فلم ناظرین کے دلوں میں گھر کر گئی ہے۔

’ستارے زمین پر‘ کو غیر تعطیلی دنوں میں بھی زبردست رسپانس ملا ہے اور ہر دن اس فلم نے کئی کروڑ کی کمائی کی ہے۔ سوشل میڈیا پر بھی فلم کی خوب تعریف ہو رہی ہے اور شائقین فلم کو ایک متاثرکن اور جذباتی تجربہ قرار دے رہے ہیں۔ فلم کی کہانی، اداکاری، ہدایت کاری اور پیشکش نے ہر طبقے کو متاثر کیا ہے۔

فلم نے پہلے دن 10.7 کروڑ، دوسرے دن 20.2 کروڑ، تیسرے دن 27.25 کروڑ، چوتھے اور پانچویں دن 8.5 کروڑ فی دن، جبکہ چھٹے دن 7.25 کروڑ روپے کمائے۔ رپورٹ کے مطابق فلم نے ساتویں دن یعنی جمعرات کو 6.75 کروڑ روپے کا بزنس کیا ہے۔

اس طرح سات دنوں میں ’ستارے زمین پر‘ کی کل کمائی 89.15 کروڑ روپے تک پہنچ گئی ہے، جو اسے سال کی سب سے زیادہ کمائی کرنے والی ساتویں فلم بناتی ہے۔ قابل ذکر بات یہ ہے کہ عامر خان کی یہ فلم اب سنی دیول کی ایکشن تھرلر فلم ’جاٹ‘ کے ہندوستان میں لائف ٹائم کلیکشن 89.50 کروڑ کے قریب پہنچ چکی ہے۔ جمعہ کے دن یعنی دوسرے ہفتے کے آغاز میں اس فلم کے اس ریکارڈ کو پیچھے چھوڑنے کی بھی پوری امید ہے۔

اب عامر خان کی یہ فلم اگلا ہدف اکشے کمار کی ’کیسری چیپٹر 2‘ ہے، جس نے 92.53 کروڑ روپے کمائے تھے۔ فلم کے بز کے مطابق امکان ہے کہ ’ستارے زمین پر‘ دوسرے جمعہ کو اس ہدف کو بھی عبور کر لے گی اور سال کی ٹاپ 6 فلموں میں شامل ہو جائے گی۔

جہاں تک بجٹ کی بات ہے، ’ستارے زمین پر‘ کی کل لاگت 90 کروڑ روپے بتائی گئی ہے۔ سات دن میں 89.15 کروڑ روپے کما کر فلم نے بجٹ واپسی کے بالکل قریب پہنچ کر ہٹ فلم کا درجہ حاصل کرنے کی بنیاد رکھ دی ہے۔ اگر دوسرے جمعہ کو فلم کی کارکردگی بہتر رہی، تو یہ اپنی لاگت بھی مکمل طور پر وصول کر لے گی اور نفع میں داخل ہو جائے گی۔

عامر خان کی فلم کے اس کامیاب آغاز نے نہ صرف ان کی اسٹار پاور کو ثابت کیا ہے بلکہ اس بات کو بھی دکھا دیا ہے کہ اچھی کہانی اور مضبوط اداکاری کی حامل فلمیں باکس آفس پر کامیاب ہو سکتی ہیں، چاہے وہ نان ہالیڈے میں ریلیز کیوں نہ ہوں۔