مصرکے شرم الشیخ میں غزہ امن معاہدے پر امریکہ، ترکی، مصر، قطر نے دستخط کردیے

مصر کے شہر شرم الشیخ میں بین الاقوامی سربراہ اجلاس کا آغاز ہو گیا ہے، جس میں غزہ امن معاہدے پر دستخط کردیے گئے ۔غزہ امن معاہدے پر ثالث ممالک کے سربراہان امریکہ، ترکی، مصر، قطر نے دستخط کیے، وزیر اعظم شہباز شریف غزہ امن معاہدے پر دستخط کی تقریب میں شریک ہیں بین الاقوامی سربراہی اجلاس سے امریکی صدر ڈونالڈ ٹرمپ نے خطاب کرتے ہوئے قطر، ترکی اور مصر کی قیادت کو خراجِ تحسین پیش کیا۔

امریکی صدر نے اپنی افتتاحی تقریر کے دوران قطر اور ترکی کے رہنماؤں کی تعریف کرتے ہوئے ان کی کوششوں کو سراہا۔ انہوں نے اپنے مصری ہم منصب کا بھی شکریہ ادا کرتے ہوئے انہیں “شاندار انسان” اور “عظیم جنرل” قرار دیا۔

امریکی صدر ڈونالڈ ٹرمپ نے کہا کہ غزہ امن معاہدے سے مشرق وسطیٰ میں امن قائم ہوگا، تاریخی دن ہے ،غزہ امن معاہدہ ایک بڑی کامیابی ہے، دوست ممالک کے تعاون سے غزہ امن معاہدہ ممکن ہوا، غزہ امن معاہدے میں مصر کا کردار اہم ہے۔ڈونالڈ ٹرمپ نے کہا کہ مشرق وسطیٰ میں دیرپا امن و استحکام چاہتے ہیں، ہم مل کر غزہ میں تعمیر نو کریں گے، ایسے کامیاب دن پہلے کبھی نہیں دیکھے تھے۔

امریکی صدر کا کہنا ہے کہ دستاویز میں غزہ سے متعلق معاہدے کے ضابطوں کی تشریح شامل ہے، غزہ معاہدہ ایک جامع معاہدہ ہے، غزہ معاہدہ سب سے مشکل کام تھا، اسرائیل اور حماس کے درمیان حالیہ معاہدہ پائیدار ہوگا، اسرائیلی یرغمالیوں کی باقیات کی حوالگی حل طلب مسئلہ ہے، غزہ میں اسرائیلی یرغمالیوں کی باقیات کی تلاش میں مدد فراہم کریں گے۔

ڈونالڈ ٹرمپ نے کہا کہ معاہدے کیلئے قطری امیر کی انتھک کاوشیں قابل تحسین ہیں، ترک صدر اردوگان کا بھی شکریہ جن کے پاس دنیا کی بہترین فوج ہے، صدر اردوگان  بہترین انسان ہیں ان کی دوستی پر شکر گزار ہوں۔

دوسری جانب غزہ میں جنگ بندی کے امن معاہدے کے تحت اسرائیلی یرغمالیوں اور فلسطینی قیدیوں کی رہائی عمل میں آگئی۔ اسرائیلی فوج کے مطابق حماس نے تمام 20 اسرائیلی یرغمالی رہا کر دیے۔ 28 یرغمالیوں کی لاشیں بھی آج ہی اسرائیل کے سپرد کی جائیں گی۔ اسرائیل کی عوفر جیل سے رہا 1 ہزار 966 فلسطینی قیدیوں کی بسیں غزہ پہنچ گئیں۔