کورونا ویکسین لینے والی پہلی سعودی خاتون کے مسرت سے لبریز تاثرات

سعودی عرب میں جمعرات سے شہریوں میں کورونا ویکسین لگائے جانے کا سلسلہ شروع کر دیا گیا ہے۔ ایک سعودی خاتون جو مملکت میں ویکسین لگانے والی پہلی خاتون ہیں، جنہوں ‌نے یہ ویکسین لگوائی ہے۔ ویکسین لگانے والی خاتون کے جذبات اور احساسات دیدنی ہیں۔ العربیہ ڈاٹ نیٹ کے مطابق ویکسین لگانے والی خاتون شیخہ الحربی نے 'ٹوئٹر' پر لکھا کہ وہ اپنی خوشی بیان نہیں کرسکتیں۔ ویکسین لگوانے کے بعد وہ خوشی سے رات کو سو نہیں سکیں۔

شیخہ الحربی نے حکومت کو ڈھیروں دعائیں دیں اور کہا کہ اللہ ہماری حکومت کو شاد و آباد رکھے جو عوام کو اتنی زیادہ توجہ دیتی ہے۔ میں خود کو ایک خوش نصیب انسان سمجھتی ہوں۔ میں پہلی خاتون ہوں جس نے ویکسین لگوائی ہے۔ ویکسین لگانے کی خوشی میری سب سے بڑی خوشی ہے۔ خیال رہے کہ سوشل میڈیا پر شیخہ الحربی نے ویکسین لگوانے کی متعدد تصاویر بھی پوسٹ کی ہیں۔ ان تصاویر میں انہیں خوشی کے جذبات میں دیکھا جاسکتا ہے۔

خیال رہے کہ سعودی عرب کے وزیر صحت ڈاکٹر توفیق الربیعہ نے گزشتہ روز کورونا ویکسین لگوائی اور اس کے بعد انہوں ‌نے عوام الناس میں یہ ویکسین لگانے کی مہم کا آغاز کر دیا تھا۔ گزشتہ روز ڈیڑھ لاکھ سے زاید افراد نے ویکسین لگوانے کے لیے اپنا رجسٹریشن کرایا ہے۔ ویکسین لازمی نہیں بلکہ اختیاری ہوگی تاہم یہ سعودی باشندوں اور تارکین وطن سب کے لیے مفت ہوگی۔

بشکریہ العربیہ ڈاٹ نیٹ