ویڈیو: ’میری بات‘ میں اظہارِ رائے کی آزادی، طلبہ کے احتجاج اور جمہوریت پر تجزیہ

قومی آواز کے تجزیاتی پروگرام ’میری بات‘ کی نویں قسط میں سید خرم رضا نے اظہارِ رائے کی آزادی، طلبہ کے احتجاج، قانون کی حکمرانی اور جمہوری اداروں کی ذمہ داریوں پر تفصیلی تجزیہ پیش کیا۔ انہوں نے کہا کہ کسی بھی مضبوط جمہوریت کی بنیاد صرف انتخابات پر نہیں بلکہ شہری آزادیوں، اختلافِ رائے کے احترام اور ریاستی اختیارات کے ذمہ دارانہ استعمال پر قائم ہوتی ہے۔

پروگرام میں احتجاج کے دوران طاقت کے استعمال، قانون نافذ کرنے والے اداروں کی جواب دہی، پارلیمنٹ کے کردار اور انسانی حقوق کے عالمی اصولوں پر بھی تجزیہ پیش کیا گیا۔ انہوں نے کہا کہ اگر منتخب نمائندے کسی کارروائی پر سوال اٹھاتے ہیں تو ان سوالات کا شفاف اور قانونی دائرے میں جواب دینا جمہوری نظام کا تقاضا ہے۔

انہوں نے زور دیا کہ احتجاج سے متعلق ہر واقعے کی غیر جانبدارانہ تحقیقات ہونی چاہئیں اور اگر کسی بھی فریق سے قانون کی خلاف ورزی ہوئی ہے تو اس کے خلاف کارروائی کی جائے۔ ان کے مطابق حکومت اور طلبہ کے درمیان بامعنی مذاکرات ہی مسائل کے پائیدار حل کا راستہ ہیں۔ انہوں نے کہا کہ مضبوط ریاست وہ ہوتی ہے جو اختلافات کو سننے کا حوصلہ رکھے، قانون کی حکمرانی کو یقینی بنائے اور ہر شہری کو اس کے جان و مال، عزت اور بنیادی حقوق کے تحفظ کا یقین دلائے۔