میزبان قطر کو پہلے ہی میچ میں ایکواڈور نے دو گولوں سے شکست دی

ایکواڈور نے انر ویلنشیا کے دو گولوں کی بدولت اتوار کو فیفا ورلڈ کپ 2022 کے افتتاحی میچ میں میزبان قطر کو 2-0 سے شکست دی۔اگر ویلنشیا  کے پہلے گول کو وی اے آر (ویڈیو اسسٹنٹ ریفری) کے ذریعہ آف سائڈ نہیں قرار دیا جاتا تو ویلنشیا کی پہلے ہی میچ میں ہیٹ ٹرک ہوتی۔  یہ پہلا عالمی کپ ہے جس میں میزبان ٹیم اپنا افتتاحی میچ ہار گئی ۔

ویلنشیا نے 16ویں منٹ میں پنالٹی کارنر کو گول میں تبدیل کیا جبکہ 31ویں منٹ میں ایک اور گول کر کے اپنی ٹیم کی سبقت کو دوگنا کر دیا۔

پہلے ہاف میں بری طرح پیچھے رہنے کے بعد قطر نے دوسرے ہاف میں اچھا کھیلتے ہوئے اپوزیشن کو مزید نقصان پہنچانے سے روکا، حالانکہ وہ خود کوئی گول نہیں کر سکے۔

میچ کے 86ویں منٹ میں قطر کو بھی ایک موقع ملا، جب منٹاری گیند کے ساتھ ایکواڈور کے گول کی طرف بڑھ رہے تھے۔ انہوں نے گول کیپر کو چکمہ دیا اور گیند کو گول کی طرف مارا لیکن وہ جال کے اوپر سے نکل گئی۔

فیفا ورلڈ کپ کی تاریخ میں پہلی بار میزبان ٹیم نے اپنی مہم کا آغاز شکست کے ساتھ کیا ہے۔ اس جیت کے ساتھ ہی ایکواڈور گروپ اے ٹیبل میں تین پوائنٹس حاصل کرکے پہلی پوزیشن پر پہنچ گیا ہے۔

پورے میچ کے دوران ایکواڈر نے اپنا دبدبا بنائے رکھا اور انہوں نے کھیل پر اپنا قبضہ بنائے رکھا۔ ویلنشیا جو ایکواڈور کے سب سے تجربہ کار کھلاڑی ہیں اور وہ ایکواڈور کے واحد کھلاڑی ہیں جو اس سے پہلے بھی عالمی کپ میں کھیل چکے ہیں۔ ایکواڈور کی ٹیم میں نوجوان کھلاڑی زیادہ ہیں۔