اڈیشہ میں بنائے جائیں گے 89 کثیر مقاصد اسٹیڈیم، 693 کروڑ روپے کا بجٹ

اڈیشہ کی نوین پٹنائک حکومت نے ریاست میں کھیلوں کے لیے بہتر سہولیات اور انفراسٹرکچر دستیاب کرانے کے مقصد سے 693.35 کروڑ روپے کے بجٹ سے 89 اِن ڈور اسٹیڈیم بنانے کا فیصلہ کیا ہے۔ قابل ذکر بات یہ ہے کہ یہ اسٹیڈیم کثیر مقاصد ہوں گے اور وبا کے ساتھ ساتھ قدرتی آفات کی صورت میں ان اسٹیڈیم کا استعمال حکومت کے ذریعہ کیا جائے گا۔ وزیر اعلیٰ نوین پٹنائک کی صدارت میں آج ہوئی ایک میٹنگ میں یہ فیصلہ لیا گیا ہے۔

ریاستی حکومت نے ان 89 اسٹیڈیمس کے تعمیراتی منصوبوں کو لے کر کہا ہے کہ آئندہ 18 مہینوں میں یہ بن کر تیار ہو جائیں گے اور اس کا استعمال وبا اور قدرتی آفت کے دوران ضرورت کے حساب سے اسپتالوں کی شکل میں بھی کیا جا سکے گا۔ بتایا جا رہا ہے کہ یہ 89 کثیر مقاصد اِن ڈور اسٹیڈیم ریاست کے سبھی شہری علاقوں میں بنائے جائیں گے تاکہ آنے والے وقت میں بین الاقوامی سطح پر ملک کا پرچم لہرانے کے لیے کھلاڑیوں کو تیار کیا جا سکے۔

واضح رہے کہ اڈیشہ حکومت ہندوستان کی مرد اور ہاکی ٹیم دونوں ہی کی آفیشیل اسپانسر بھی ہے۔ اس کے ساتھ ہی ریاستی حکومت کی کوششوں سے ہی 2018 میں ہاکی عالمی کپ کا انعقاد بھونیشور میں کیا گیا تھا۔ حکومت آنے والے دنوں میں ریاست کو اسپورٹس کے لیے بہتر مقام بنانا چاہتی ہے اور اسی لیے 693.35 کروڑ روپے کی سرمایہ کاری سے اسپورٹس انفراسٹرکچر ڈیولپمنٹ پروجیکٹس کے تحت یہ اِن ڈور اسٹیڈیم بنانے کا فیصلہ لیا گیا ہے۔ ان اسٹیڈیم میں بیڈمنٹن، ٹیبل ٹینس، یوگا، جمنازیم وغیرہ کی سہولت ہوں گی۔

میڈیا ذرائع سے موصول ہو رہی اطلاعات کے مطابق اِن ڈور اسٹیڈیمس کو 200 کلو میٹر فی گھنٹہ کی رفتار سے چلنے والی ہوا کا سامنا کرنے کے لیے ڈیزائن کیا جائے گا۔ اسٹیڈیمس میں طلبا کو یوگا اور دیگر جسمانی ورزش میں ٹریننگ کرنے کی سہولت موجود ہوگی۔ کھلاڑیوں کو یہاں زمینی سطح پر پروفیشنل کوچنگ دی جائے گی۔ اس درمیان اڈیشہ کے وزیر برائے ماہی پروری ارون ساہو نے کہا کہ ’’کثیر مقاصد اِن ڈور اسٹیڈیم کی تعمیر ہمارا خواب تھا۔ میں اس کے لیے وزیر اعلیٰ کا شکریہ کرنا چاہتا ہوں۔‘‘ ریاستی وزیر برائے سائنس اینڈ ٹیکنالوجی اشوک پانڈا نے اس تعلق سے کہا کہ ’’وزیر اعلیٰ نے بھونیشور کے ایکامرا علاقہ میں اِن ڈور اسٹیڈیم کے قیام کو منظوری دے دی ہے۔ ہم نے وزیر اعلیٰ سے گزارش کی اور انھیں ایک درخواست بھیجی اور انھوں نے کابینہ میں منظوری دینے کے لیے اس پر اپنی رائے دی۔ آج ہم اسی کے لیے اکٹھے ہوئے ہیں۔‘‘