کرپشن الزامات، جرمن پبلک میڈیا زیربحث

پیٹریشیا شلیزنگر کے خلاف عائد کردہ الزامات کی فہرست خاصی لمبی ہے۔ وہ ابھی کچھ روز قبل تک علاقائی پبلک براڈکاسٹر RBB (ریڈیو برلن برانڈن برگ) کی ڈائریکٹر تھیں جب کہ جرمنی کے قومی سطح پر نو علاقائی براڈکاسٹرز اور ڈوئچے ویلے کی گردشی سربراہی پر بھی فائز تھیں۔

جرمنی میں پبلک نشریاتی اداروں کے لیے فی گھرانا ماہانہ 18.36 یورو کی لازمی فیس وصول کی جاتی ہے۔ ایسے میں کرپشن اسکینڈل نے جرمنی میں پبلک براڈکاسٹنگ کے شبعے میں تبدیلیوں کے مطالبات کو مہمیز دی ہے۔ شلیزنگر پر الزامات ہیں کہ انہوں نے مشکوک انداز سے سرمائے کا استعمال کیا جب کہ کنسلٹنسی کانٹریکٹ بھی متنازعہ انداز سے دیے۔

کچھ ہفتے قبل جرمن اخبار ''بزنس انسائیڈر‘‘ نے شلیزنگر اور ان کے شوہر گیئرہارڈ شپؤرل کے کاروباری معاملات میں 'عدم تسلسل‘ کا دعویٰ کیا تھا۔ اس سلسلے میں ایک الزام یہ تھا کہ ایک لاکھ یورو کا ایک کنسلٹنسی کانٹریکٹ شپرؤل کو دارالحکومت برلن میں تجارتی نمائش (برلن ٹریڈ فیئر) کے سلسلے میں دیا گیا۔ اس تجارتی نمائش کے چیف ایگزیکٹیو آفیسر وولف ڈِیٹر وولف، شیلزنگر کے نشریاتی ادارے آر بی بی کے بورڈ آف ڈائریکٹرز میں بھی شامل تھے۔ اخبار کے مطابق وولف نے اس سلسلے میں ذاتی حمایت کے ذریعے شپرؤل کو یہ متنازعہ کانٹریکٹ دلوانے میں مدد کی۔

اس کے بعد شیلزنگر کے حوالے سے متعدد دیگر معاملات بھی سامنے آتے چلے گئے۔ اس سلسلے میں ابتدا میں اخبار بزنس انسائیڈر ہی نے تحقیقی کام کو آگے بڑھایا۔

شیلزنگر جو خود اے آر ڈی کی ایک انتہائی معتبر صحافی رہی ہیں، جولائی سے توجہ کا مرکز ہیں۔ بتایا گیا تھا کہ آر بی بی جو اس وقت سخت مالیاتی مسائل کا شکار ہے، اس کی جانب سے شیلزنگر کو تنخواہ پر 16 فیصد زائد بونس ملے یوں ان کی مجموعی سالانہ تنخواہ تین لاکھ تین ہزار یورو تک پہنچ گئی۔ اس پر مزید 20 ہزار کا ایک اضافی بونس بھی انہیں ملا۔ وہ مزید توجہ کا مرکز تب بنیں جب انہیں انتہائی مہنگی کار رینٹل کمپنی سے شوفر کی سروسز لیتے دیکھا گیا جب کہ ان کے پرائیویٹ اپارٹمنٹ میں انتہائی پرتعیش عشائیے دیے گئے۔

رواں ماہ کے آغاز پر 61 سالہ شیلزنگر نے اے آر ڈی کی ڈائریکٹرشپ سے علیحدگی اختیار کر لی۔ گزشتہ 70 برسوں میں جرمنی میں پبلک براڈکاسٹنگ کے شعبے میں اپنی نوعیت کا یہ پہلا واقعہ تھا۔ تین روز بعد انہوں نے آر بی بی کی سربراہی سے بھی استعفیٰ دے دیا۔

اس کے دو روز بعد پتا چلا کہ صوبائی پراسیکیوٹرز ان کی بابت بدعنوانی اور بدانتظامی کے معاملات کی چھان بین کر رہے ہیں۔ اسی تناظر میں ان کے شوہر اور وولف بھی آر بی بی کے بورڈ سے مستعفی ہو گئے۔ ان واقعات کے بعد جرمنی میں اے آر ڈی نیٹ ورک اور زیڈ ڈی ایف ٹی وی چینل کی فنڈنگ سے متعلق بحث زور پکڑ گئی۔

جرمنی میں پبلک براڈکاسٹرز کے لیے پبلک فنڈنگ سے متعلق بحث نئی نہیں ہے۔ قومی سطح پر عوامی رائے کے حوالے سے جتنا اثر ورسوخ ان نشریاتی اداروں کا ہے، اس پر بھی کئی سوالات اٹھائے جاتے ہیں۔ کووِڈ کے وبائی دنوں میں ویکسینیشن اور وبائی پابندیوں کے حق میں رپورٹنگ پر بعض حلقوں نے ان نشریاتی اداروں پر شدید تنقید کی تھی جب کہ ان پر 'ایجنڈے کے تحت حقائق توڑ مروڑ کر پیش کرنے‘ تک کے الزامات عائد کیے گئے۔

دوسری عالمی جنگ میں نازی جرمنی کی شکست کے بعد مغربی اتحادیوں امریکا، فرانس اور برطانیہ نے جرمنی میں پبلک براڈکاسٹنگ نظام کی بنیاد رکھی تھی۔ اس کا مقصد آزاد اور شفاف رپورٹنگ کی حوصلہ افزائی تھی اور میڈیا سے حکومتی اثرورسوخ میں کمی تھا۔

اس نظام کے تحت نشریاتی نظام کے لیے سرمایہ حکومت سے لینے کی بجائے فیس کی صورت میں عوام سے لیا جاتا ہے اور اسی لیے ان کا انتظام و انصرام بھی حکومت کے پاس نہیں ہوتا۔ اس لازمی فیس کے تناظر میں اس فنڈنگ پر سوالات اٹھائے جاتے رہے ہیں مگر آزاد رپورٹنگ کی اہمیت کی وجہ سے ان نشریاتی اداروں کی عوام میں پزیرائی بھی موجود رہی ہے۔

جرمنی کے ایک اہم صحافی اشٹیفان نیگیمائر نے تاہم معروف ٹی وی پروگرام ٹاگیس تھیمن کے ساتھ ایک انٹرویو میں کہا کہ شلیزنگر اسکینڈل کی وجہ سے جرمنی میں پبلک براڈکاسٹنگ کو 'شدید نقصان‘ پہنچا ہے اور اب اس نظام کی بابت پہلے سے جاری بحث میں مزید شدت پیدا ہو گی۔