سعودی عرب پاکستان میں ایک ارب ڈالر کی سرمایہ کاری کرے گا

پاکستان کے وزیر خارجہ بلاول بھٹو زرداری نے اپنے سعودی ہم منصب فیصل بن فرحان السعود کے ساتھ فون پر بات چیت کے بعد سماجی رابطے کی ویب سائٹ ٹوئٹر پر جاری ایک بیان میں اس پیش رفت کی تصدیق کی۔

بلاول بھٹو نے ٹویٹ میں لکھا، "سعودی وزیر خارجہ فیصل بن فرحان سے بات ہوئی۔ برادرانہ تعلقات پر بات ہوئی۔ سعودی عرب کی طرف سے پاکستان میں ایک ارب ڈالر کی سرمایہ کاری کے عزم کا خیر مقدم کیا۔"

انہوں نے مزید لکھا،"میں نے اپنے ہم منصب کو پاکستان میں غیر معمولی سیلاب کی وجہ سے ہونے والے نقصانات سے آگاہ کیا۔ انہوں نے یگانگت کا اظہار کیا اور سعودی عرب کی جانب سے ہر ممکن مدد کی بات کہی۔"

دریں اثنا سعودی عرب کی سرکاری خبر رساں ایجنسی ایس پی اے نے بھی بتایا کہ"شاہ سلمان بن عبدالعزیز نے پاکستان کی معیشت اور اس کے برادر عوام کی حمایت میں مملکت کے موقف کے عین مطابق ایک ارب ڈالر کی سرمایہ کاری کا حکم دیا ہے۔"

خبر میں مزید کہا گیا ہے کہ سعودی وزیر خارجہ شہزادہ فیصل بن فرحان نے اپنے پاکستانی ہم منصب بلاول بھٹو زرداری سے فون پر گفتگو کی اور انہیں اس فیصلے سے آگاہ کر دیا ہے۔ دونو ں وزرائے خارجہ نے باہمی تعلقات اور ان میں بہتری لانے کے طریقوں کے علاوہ باہمی دلچسپی کے علاقائی اور بین الاقوامی امور پر بھی تبادلہ خیال کیا۔

یہ اہم پیش رفت قطر انوسٹمنٹ اتھارٹی کی جانب سے پاکستان میں تین ارب ڈالر کی سرمایہ کاری کا عندیہ دیے جانے کے ایک دن بعد ہوئی ہے۔

قطر میں انتظامی امور کے خود مختار ادارے امیری دیوان کی طرف سے جاری ایک بیان میں کہا گیا تھا کہ، "قطر انوسٹمنٹ اتھارٹی اسلامی جمہوریہ پاکستان میں کمرشیل اور سرمایہ کاری کے مختلف شعبوں میں تین ارب ڈالر کی سرمایہ کاری کرنے کا خواہاں ہے۔"

یہ اعلان پاکستان کے وزیر اعظم شہباز شریف کے دوحہ دورے کے دوران کیا گیا۔ انہوں نے منگل کے روز قطر انوسٹمنٹ اتھارٹی کے ساتھ میٹنگ کے بعد بدھ کے روز قطر کے امیر شیخ تمیم بن حماد الثانی سے ملاقات کی تھی۔

اس سے قبل وزیر اعظم شہباز شریف کے قریبی ذرائع نے کہا تھا کہ وہ حکومتی ملکیت والے اداروں بشمول پاکستان انٹرنیشنل ایئر لائنز اور نیویارک میں روزویلٹ ہوٹل میں قطر کو شراکت داری کی پیش کش کرسکتے ہیں۔

پاکستانی معیشت اس وقت بدترین مسائل سے دوچار ہے اور اسے ادائیگی کے توازن کے بحران کا سامنا ہے۔ اس کے غیرملکی زرمبادلہ کے ذخائر گر کر7.8 ارب ڈالر تک پہنچ چکے ہیں جو ایک ماہ سے زیادہ درآمدات کے لیے بمشکل کافی ہیں۔

پاکستان کرنٹ اکاؤنٹ کے بڑھتے ہوئے خسارے، امریکی ڈالر کے مقابلے میں روپے کی قدرمیں کمی اور افراط زرکی بڑھتی ہوئی شرح سے بھی نبردآزما ہے۔ اگست میں افراط زرکی شرح 42 فی صد سے زیادہ رہنے کا امکان ہے۔