سماج

بیلجیم: قیدی جیل کا ٹوائلٹ توڑ کر فرار

پولیس حکام کے مطابق 25 سالہ ایک شخص گرفتاری کے چند گھنٹے بعد ہی برسلز کی ایک جیل سے فرار ہونے میں کامیاب ہو گیا۔ اس نے دیوار کے ساتھ نصب ٹوائلٹ توڑا اور سیوریج کا سورخ بڑا کر کے فرار ہو گیا۔

بیلجیم: قیدی جیل کا ٹوائلٹ توڑ کر فرار
بیلجیم: قیدی جیل کا ٹوائلٹ توڑ کر فرار 

برسلز پولیس کے ترجمان نے خبر رساں ادارے اے ایف پی کو بتایا کہ مفرور ہونے والے ملزم نے سیوریج ہول کو توڑ کر صرف اتنا ہی سوراخ بڑا کیا، جتنا کہ اے فور سائز کا پیپر ہوتا ہے۔

ترجمان نے مزید کہا کہ اس سوراخ کے ذریعے اس قیدی نے جیل میں موجود زیر زمین راہداری تک رسائی حاصل کی، جہاں وہ ایک کھڑکی سے باہر سڑک تک پہنچنے میں کامیاب ہو گیا۔ بیلجیم کے نشریاتی ادارے وی آر ٹی کے مطابق اس واقعے کے وقت حراستی سیل میں موجود سکیورٹی کیمرے کام نہیں کر رہے تھے۔

جیل میں گزارے چند گھنٹے

مشتبہ شخص قانون نافذ کرنے والے اداروں پر حملوں اور منشیات سے متعلق الزامات میں ویسٹ فلینڈرز پراسیکیوٹر کے دفتر کو مطلوب تھا۔

اس شخص کو پولیس کے سامنے پیش ہونے کے حکم کی خلاف ورزی کرنے کے الزام میں رواں ہفتے پیر کے روز گرفتار کیا گیا تھا، جس کے چند گھنٹے بعد ہی وہ جیل سے فرار ہونے میں کامیاب ہو گیا۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔