سید ناصر حسین جموں و کشمیر میں کانگریس کو ریاست سے بلاک سطح تک مضبوط کرنے کے لیے پرعزم

سری نگر: آل انڈیا کانگریس کمیٹی کے قومی جنرل سکریٹری اور راجیہ سبھا کے رکن سید ناصر حسین ان دنوں کشمیر کے دورے پر ہیں۔ اس سے پہلے بھی رکن پارلیمنٹ ناصر حسین کئی بار جموں و کشمیر کا دورہ کر چکے ہیں۔ کشمیر کے اپنے 2 روزہ دورے کے دوران رکن پارلیمنٹ نے ریاست بھر کے تمام ضلعی اور ریاستی لیڈروں و کارکنوں سے الگ الگ ملاقات کی۔ اس ملاقات کے دوران انھوں نے بتایا کہ ہم نے پوری ریاست میں بلاک سطح پر کانگریس پارٹی کو مضبوط کرنے کا کام شروع کر دیا ہے اور میں ریاست میں کانگریس پارٹی سے وابستہ ہر لیڈر اور کارکن سے ملاقات کر رہا ہوں۔ یہ جاننے کی کوشش کر رہا ہوں کہ ہم کس طرح کانگریس پارٹی کو تنظیمی سطح پر مزید مضبوط کر سکتے ہیں۔

سید ناصر حسین نے کہا کہ اپنے پچھلے دورے میں جس طرح میں نے جموں ڈویژن کے رہنماؤں اور کارکنوں سے ملاقات کی تھی، اسی طرح اس بار بھی میں نے کشمیر ڈویژن کے رہنماؤں سے ملاقات کی ہے اور سب کو الگ الگ وقت دیا ہے تاکہ ہر کسی کی رائے کو اچھی طرح سمجھا اور سنا جا سکے۔ اس بار کانگریس پارٹی کے کچھ پرانے سینئر رہنماؤں کو بھی دوبارہ پارٹی میں شامل کر کے پارٹی کی رکنیت دی جا رہی ہے، تاکہ پارٹی کو مزید مضبوط کیا جا سکے۔ حتمی فیصلے کے لیے ریاست کے سینئر لیڈروں، ریاستی صدر، انچارج سکریٹریوں سے مشاورت کی جا رہی ہے۔ انہوں نے بتایا کہ پارٹی میں دوبارہ شامل ہونے والے تمام لوگوں نے کہا کہ انہیں کانگریس چھوڑنے پر افسوس ہے اور انہیں ہمیشہ افسوس رہے گا۔ آج وہ دوبارہ کانگریس میں شامل ہو کر بہت خوش ہیں اور از سر نو پارٹی کو مضبوط کرنے کے لیے کام کریں گے۔

کانگریس جنرل سکریٹری ناصر حسین نے کہا کہ کانگریس پارٹی جلد ہی پوری ریاست میں پروگرام ’ہماری ریاست، ہمارا حق‘ شروع کرنے جا رہی ہے اور اس پروگرام کو جموں و کشمیر کے ہر گھر تک کیسے پہنچایا جائے، اس پر سنجیدگی سے غور و فکر کی جا رہی ہے۔ ساتھ ہی انہوں نے کہا کہ جموں و کشمیر کے لوگ بھی اب چاہتے ہیں کہ کانگریس جیسی قومی پارٹی ان کی ریاست میں مضبوط ہو تاکہ ہماری ریاست تیزی سے ترقی کر سکے۔