جمعیۃ علماء ہند نے لوگوں سے وقف بل کے خلاف مسلم پرسنل لاء بورڈ کے احتجاجی مظاہرے میں شرکت کی اپیل کی

نئی دہلی: آل انڈیا مسلم پرسنل لاء بورڈ و دیگر ملی جماعتوں کی جانب سے 13 مارچ 2025 کو جنتر منتر، نئی دہلی میں وقف بل کے خلاف ایک بڑا احتجاجی مظاہرہ منعقد کیا جا رہا ہے۔ جمعیۃ علماء ہند کے صدر مولانا محمود اسعد مدنی اور ناظم عمومی مولانا محمد حکیم الدین قاسمی نے اس مظاہرے کی مکمل تائید کرتے ہوئے کہا ہے کہ حکومت کا موجودہ وقف بل پر اصرار مسلم اوقاف کی مذہبی و دینی حیثیت کو ختم کرنے کی کوشش ہے۔

انھوں نے واضح کیا کہ وقف کسی فرد کی ملکیت نہیں، بلکہ اللہ کی ملکیت ہے۔ اس کی اصل میں کسی قسم کی تبدیلی یا مداخلت نہ صرف شرعی اصولوں کے خلاف ہے بلکہ آئینی حقوق کی بھی خلاف ورزی ہے۔ ہم حکومت کو واضح طور پر متنبہ کرتے ہیں کہ وہ مسلمانوں کے مذہبی معاملات میں دخل اندازی سے باز رہے۔

اس موقع پر جمعیۃ علماء ہند تمام انصاف پسند شہریوں، دینی و سماجی رہنماؤں اور ملت کے تمام طبقات سے خصوصی اپیل بھی کی۔ جمعیۃ نے کہا کہ سبھی مسلم پرسنل لاء بورڈ کے ذریعہ کیے جانے والے اس پرامن احتجاج میں بھرپور شرکت کریں۔ ضروری ہے کہ اس مشکل وقت میں سبھی اپنے جمہوری و آئینی حق کی حفاظت کے لیے اپنے حصے کا عملی کردار پیش کریں۔