بھارت بند: امروہہ میں بھی مودی حکومت کے خلاف زبردست احتجاجی مارچ

سالار غازی

امروہہ: ملک میں مسلسل بڑھتی مہنگائی اور آسمان چھوتی تیل قیمتوں کے خلاف کانگریس پارٹی کی اپیل پر ملک گیر سطح پر ہوا ’بھارت بند‘ کل ملا کر امروہہ میں بھی کامیاب رہا۔ سرکار مخالف احتجاجی مظاہرہ و مارچ کے دوران بند میں شامل حزب اختلاف جماعتوں کے ذریعے سرکار کی نیت پر سوالیہ نشان لگایا اور ہندوستان میں پٹرولیم اشیا کی قیمتوں میں ہو رہے اضافہ پر سخت رد عمل کا اظہار کیا۔

کانگریس پارٹی کی اپیل پر مہنگائی و پٹرولیم اشیا کی قیمتوں میں مسلسل اضافہ کے خلاف ہونے والے بند کے تحت امروہہ میں حالانکہ بازار حسب معمول کھلے رہے لیکن احتجاج میں شامل جماعتوں نے مارچ و احتجاجی مظاہرہ کے ذریعے سرکار پر جم کر نشانہ سادھا اور سرکار کی عوام مخالف پالیسیوں کو مہنگائی کا ذمہ دار بتاتے ہوئے پٹرولیم اشیا کی قیمتوں میں مسلسل اضافہ پر کسی گہری سازش یا بدعنوانی کا خدشہ ظاہر کیا۔

مظاہرین نے گورنر اتر پردیش کو مطالباتی مکتوب بھی ارسال کیا۔ جس میں مہنگائی پر ناراضگی کا اظہار کرتے ہوئے کسانوں کے بقایہ کی ادائیگی و دیگر مطالبات بھی کیے۔ بھارت بند کے تحت جہاں کانگریس پارٹی نے مارچ نکال کر دکانداروں و تاجران سے اپنی دوکانیں اور کارخانے بند کرنے کی اپیل کی، وہیں سماج وادی پارٹی نے ہائی کمان کی ہدایت کے مطابق امروہہ تحصیل پر احتجاجی مظاہرہ کرتے ہوئے بڑھتی مہنگائی و تیل قیمتوں میں اضافہ پر حکومت کے خلاف سخت ناراضگی کا اظہار کیا۔

کانگریس کے احتجاجی مظاہرہ کو راشٹریہ لوک دل کی حمایت حاصل رہی اور چودھری اجیت سنگھ کی ہدایت پر پارٹی کی علاقائی یونٹ نے کانگریس کے مارچ میں شرکت کی۔ حالانکہ مارچ تحصیل امروہہ پہنچنے پر رکن قانون ساز کونسل پرویز علی کی قیادت میں سماج وادی پارٹی کے احتجاجی مظاہرہ میں تمام حزب اختلاف جماعتوں نے شرکت کر کے اپنی یکجہتی کا مظاہرہ بھی کیا۔

تحصیل امروہہ پر جاری سماج وادی پارٹی کے مظاہرہ سے راشٹریہ لوک دل کے ضلع صدر شور ویر سنگھ کانگریس ضلع صدر چودھری سکھراج سنگھ، کانگریس شہر صدر فیض عالم رائنی و دیگر لوگوں نے خطاب کیا اور بھاجپا قیادت والی مرکزی و صوبائی حکومت پر سخت تنقید کی۔

’بھارت بند‘ کے تحت کانگریس کے مارچ کا انعقاد امروہہ کے ٹاؤن حال واقعے پارٹی کے شہر دفتر سے صبح تقریباً 11بجے ضلع صدر چودھری سکھراج سنگھ ، رکن پی سی سی ڈاکٹر سراج الدین ہاشمی و شہر صدر فیض عالم رائنی کی قیادت میں ہوا، اعلان کے مطابق راشٹریہ لوک دل کے ضلع صدر چودھری شورویر سنگھ، سابق ایم ایل اے نوگاواں سادات اشفاق علی خان و دیگر لیڈران نے بھی مارچ میں شرکت کی۔