اعلیٰ حضرت کے عرس پر عمران پرتاپ گڑھی کے سفیر ملکارجن کھڑگے کی چادر لے کر پہنچے

بریلی: دنیا کی مشہور درگاہ اعلیٰ حضرت پر منعقد ہونے والے 107ویں عرس رضوی کے موقع پر کانگریس صدر ملکارجن کھڑگے کی چادر کو خراج عقیدت کے طور پر آل انڈیا کانگریس کمیٹی اقلیتی ڈپارٹمنٹ کے قومی صدر اور راجیہ سبھا کے رکن عمران پرتاپ گڑھی نے روانہ کیا۔ کانگریس اقلیتی ڈپارٹمنٹ کے قومی جنرل سکریٹری اور میڈیا انچارج عدنان اشرف، قومی جنرل سکریٹری شمیم علوی، اترپردیش کے شریک انچارج محمود خان، ہریانہ کے انچارج سردار اندرجیت سنگھ بنگا، اتراکھنڈ انچارج کیپٹن نصیب سنگھ سندھو اور اترپردیش اقلیتی ڈپارٹمنٹ کے دیگر تمام لیڈران اس چادر کے ساتھ بریلی پہنچے۔

بریلی پہنچنے پر کانگریس پارٹی کے لوگوں نے تمام لیڈروں کا پرتپاک استقبال کیا۔ اس موقع پر چادر پوشی سے قبل درگاہ کے صحن میں کانگریس لیڈر عمران پرتاپ گڑھی کا بھیجا گیا پیغام پڑھ کر سنایا گیا جس میں عمران پرتاپ گڑھی نے بنیادی طور پر لکھا تھا کہ اعلیٰ حضرت کی زندگی انسانیت، محبت اور بھائی چارے کی مثال ہے۔ ان کا پیغام تمام مذاہب کے لوگوں کو اکٹھے رہنے اور ملک کی ترقی میں اپنا حصہ ڈالنے کی ترغیب دیتا ہے۔

اس کے بعد تمام قائدین چادر لے کر مزار پر پہنچے، جہاں چادر پوشی کے بعد ملک میں امن، ترقی، بھائی چارے اور سماجی ہم آہنگی کے لیے دعائیں مانگی گئیں۔ اس موقع پر اترپردیش کانگریس کمیٹی کے سابق سکریٹری چودھری اسلم میاں، اقلیتی محکمہ کے ریاستی کنٹرول روم کے انچارج انور انیس، بدایوں کوآرڈینیٹر کلبھوشن ترپاٹھی، میٹروپولیٹن صدر دنیش ڈاڈا، ریاستی جنرل سکریٹری حسنین انصاری، ضلع اقلیتی صدر شہزاد علی، سابق ایم ایل سی امیدوار ڈاکٹر مہندی حسن اور دیگر بھی موجود تھے۔