ادب و ثقافت کی روشن شام، ’کلچرل وسٹا‘ کے ذریعہ یادگار مشاعرہ کا انعقاد

نئی دہلی: راجدھانی دہلی کی ادبی فضا اُس وقت معطر ہو گئی جب اسٹارٹ اَپ ’یوگدان‘ کی ثقافتی ونگ ’کلچرل وسٹا‘ نے ’آپ اور ہم‘ کے عنوان سے ایک شاندار اور بامعنی مشاعرے کا انعقاد کیا۔ انڈیا اسلامک کلچرل سینٹر میں منعقد ہونے والی یہ تقریب نہ صرف شعری نشست تھی بلکہ زبان و ادب کی خدمت کرنے والوں کو خراجِ تحسین پیش کرنے کا خوبصورت موقع بھی تھی۔

تقریب کی صدارت سپریم کورٹ کے سینئر وکیل، انڈیا اسلامک کلچرل سینٹر کے سابق سکریٹری اور سبکدوش آئی آر ایس افسر ابرار احمد نے کی۔ افتتاح آل انڈیا کانگریس کمیٹی کے او بی سی ڈپارٹمنٹ کے سوشل میڈیا چیئرمین محمد ہدایت اللہ نے کیا۔ مہمانِ ذی وقار کی حیثیت سے آل انڈیا حج و عمرہ ٹور آپریٹرز کے جنرل سیکریٹری سہیل اے صدیقی شریک ہوئے، جبکہ ادبی و ثقافتی تنظیم ’امیز فاؤنڈیشن‘ کے بانی راگھویندر دویدی مہمانِ اعزازی تھے۔

اس موقع پر ادب اور صحافت کے میدان میں نمایاں خدمات انجام دینے والی شخصیات کو اعزازات سے نوازا گیا۔ سینئر شاعر عرفان اعظمی کو شعری خدمات کے اعتراف میں، جبکہ اُروشی اگروال کو ہندی ساہتیہ کے میدان میں سرگرم کردار ادا کرنے پر اعزاز پیش کیا گیا۔ صحافتی خدمات کے اعتراف میں سینئر صحافی ارشد ندیم کو اور آرٹ، ڈیزائن اور ادب کی اشاعت کے ذریعے اردو زبان کی ترویج میں نمایاں کردار ادا کرنے پر عبارت پبلی کیشن کے بانی سلام الدین خاں کو بھی اعزاز دیا گیا۔

مشاعرے میں ملک کے مختلف حصوں سے آئے شعرا نے اپنے کلام سے سامعین کو محظوظ کیا۔ اقبال اشہر، شاہد انجم، عزم شاکری، دلشاد نظمی، معین شاداب، التمش عباس، کاشف رضا، انس فیضی، خالد اخلاق، اُروشی اگروال اُروشی، ریشما زیدی، زرین صدیقی، گایتری مہتہ، ہمانشی بابرہ، شارقہ ملک، علما ہاشمی، عمر اظہار، زبیر احمد، تسلیم عارفی اور ملک رضوان نے اپنے منفرد اسلوب اور دلنشیں اشعار سے محفل کو گرما دیا۔ نظامت کے فرائض معین شاداب نے اپنے مخصوص اور شگفتہ انداز میں انجام دیے، جس نے محفل کی دلکشی کو دوچند کر دیا۔

تقریب کے اختتام پر ’کلچرل وسٹا‘ کی بانی زرین صدیقی نے تمام مہمانوں اور شرکا کا شکریہ ادا کرتے ہوئے اس عزم کا اظہار کیا کہ ایسے ادبی پروگرام مستقبل میں بھی منعقد کیے جاتے رہیں گے تاکہ زبان و ادب کی روایت کو نئی نسل تک منتقل کیا جا سکے۔

اس یادگار شام میں متعدد معزز شخصیات نے شرکت کی، جن میں سکندر حیات، خورشید ربانی، مسعود ہاشمی، محمد ساجد، سعد اختر، عمران راہی، عارفہ اتساہی، دامنی یادو، راکھی چودھری، سُربھی کپور، ارشان حسین، پون ہورا، اندو گپتا، یامنی بترا اور النکرت سریواستو کے نام نمایاں ہیں۔ یہ مشاعرہ اس حقیقت کی روشن مثال تھا کہ ادب اور ثقافت آج بھی دلوں کو جوڑنے اور معاشرے میں فکری ہم آہنگی پیدا کرنے کی قوت رکھتے ہیں۔ ’کلچرل وسٹا‘ کی یہ کاوش نہ صرف قابلِ ستائش ہے بلکہ اس بات کی دلیل بھی ہے کہ اردو زبان و ادب کا چراغ پوری آب و تاب کے ساتھ روشن ہے۔