دہلی میں فضائی آلودگی، لال قلعہ اور کرتویہ پتھ پر دھند کا راج...دیکھیں تصویریں

دہلی میں فضائی آلودگی نے ایک بار پھر خطرے کی گھنٹی بجا دی ہے۔ ہفتہ کی صبح لال قلعہ اور کرتویہ پتھ کے اطراف گہری دھند کی تہہ چھائی نظر آئی۔ فضاء میں زہریلے ذرات کی موجودگی نے نہ صرف نظاروں کو دھندلا دیا بلکہ لوگوں کی سانس لینا بھی دشوار بنا دیا۔

مرکزی آلودگی کنٹرول بورڈ (سی پی سی بی) کے مطابق آنند وہار میں ایئر کوالٹی انڈیکس (اے کیو آئی) 412 درج کیا گیا، جو ’سنگین‘ زمرے میں آتا ہے۔ اس صورتحال کے باعث شہریوں کو سانس لینے میں دشواری ہو رہی ہے اور آنکھوں میں جلن کی شکایتیں بھی بڑھ گئی ہیں۔

راجدھانی کے 5 علاقے چاندنی چوک، بوانا، شادی پور، وزیر پور اور پنجابی باغ، ’ریڈ زون‘ میں پہنچ چکے ہیں۔ ان علاقوں میں اے کیو آئی 300 سے اوپر ریکارڈ کیا گیا ہے۔ حکام نے فضائی معیار بہتر کرنے کے لیے مختلف اقدامات شروع کیے ہیں۔

انتظامیہ نے دہلی میں جی آر اے پی (گریپ)-2 نافذ کر دیا ہے۔ کئی مقامات پر اسپریںکلر مشینوں کے ذریعے پانی کا چھڑکاؤ کیا جا رہا ہے تاکہ دھول کے ذرات کو کم کیا جا سکے۔ تاہم شہریوں کا کہنا ہے کہ یہ اقدامات وقتی ریلیف تو دیتے ہیں لیکن مستقل حل نہیں۔

حکومت نے آلودگی پر قابو پانے کے لیے مصنوعی بارش کروانے کی تیاری شروع کر دی ہے۔ محکمہ موسمیات نے 28 تا 30 اکتوبر بادلوں کی موجودگی کا امکان ظاہر کیا ہے، ایسے میں امید کی جا رہی ہے کہ 29 اکتوبر کو دہلی میں پہلی مصنوعی بارش ہو سکتی ہے۔