امریکی سفیر نے جموں و کشمیر کو ہندوستان کا اہم حصہ بتایا، پاکستان نے امریکی سفارت کار کو طلب کر لیا

ہندوستان میں امریکی سفیر سرجیو گور کے جموں و کشمیر کو ہندوستان کا اہم حصہ قرار دینے کے بیان پر پاکستان برہم ہے۔ پاکستانی وزارت خارجہ نے سرجیو گور کے بیان  پر احتجاج کے لیے پاکستان میں امریکی ناظم الامور نتالی بیکر کو طلب کیا۔ پاکستان کی وزارت خارجہ کے مطابق امریکی سفیر کا جموں و کشمیر کے تنازع پر بیان امریکہ کے دیرینہ موقف کے خلاف ہے۔ پاکستان نے امریکہ پر زور دیا کہ وہ اس بات کو یقینی بنائے کہ اس کے عوامی بیانات جموں و کشمیر کی متنازعہ حیثیت سے ہم آہنگ ہوں۔

ہندوستان میں امریکی سفیر سرجیو گور نے بدھ کے روز کہا کہ امریکہ جموں و کشمیر کے لیے ٹریول ایڈوائزری کا جائزہ لے گا، کیونکہ مرکزی حکومت اور وزیر اعلیٰ عمر عبداللہ نے خطے کو مزید محفوظ بنانے کے لیے اقدامات کیے ہیں۔ انہوں نے مزید کہا کہ جموں و کشمیر ہندوستان کا اہم حصہ اور ایک بہت ہی خوبصورت جگہ ہے۔ گور نے کہا، "امریکہ سفری انتباہات جاری کرتا ہے، اور ہم وقتاً فوقتاً ان کا جائزہ لیتے ہیں۔ میں آج یہاں کوئی بڑا اعلان نہیں کر سکتا، لیکن ہم اس معاملے پر ضرور غور کریں گے۔"

نیوز پورٹل ’اے بی پی‘ پر شائع خبر کے مطابق سرجیو گور نے مزید کہا، "ہمیں یقین ہے کہ نئی دہلی، اس کے وزیر اعلیٰ اور اس کی انتظامیہ نے اس خطے کو محفوظ بنانے کے لیے کچھ بہترین اقدامات کیے ہیں۔ اس لیے ہم اس بات پر غور کریں گے کہ آیا امریکہ کی جانب سے جاری کردہ سفری وارننگ کی سطح کو کم کیا جانا چاہیے، کیونکہ جیسا کہ میں نے پہلے کہا، یہ ایک خوبصورت جگہ ہے۔ میرے خیال میں بہت سے امریکی جموں و کشمیر کی خوبصورتی کو دیکھنے اور اس کے فراہم کردہ مواقع کے بارے میں جاننے کے لیے جانا پسند کریں گے۔"