ٹرمپ نے ’اے آئی‘ کا نام بدل کر ’سپر انٹیلیجنس‘ کیا، مسک، پچائی، زکربرگ کی موجودگی میں ایگزیکٹو آرڈر پر دستخط

امریکہ  کے صدر ڈونالڈ ٹرمپ نے وائٹ ہاؤس میں ٹیک ماہرین کے ساتھ ایک اہم میٹنگ کی تھی، جس کے بعد انہوں نے ’مصنوعی ذہانت‘ (اے آئی) کا نام تبدیل کرنے کا فیصلہ لیا۔ اب میڈیا میں آ رہی خبروں کے مطابق ’اے آئی‘ کا نام تبدیل کر کے ’ایس آئی‘ کر دیا گیا ہے۔ ٹرمپ نے میٹنگ کے بعد میڈیا بریفنگ میں اس کی اطلاع دی۔ امریکی صدر نے کہا کہ ’آرٹیفیشل انٹیلیجنس‘ کا نام تبدیل کرنے کے لیے ایک ڈاکیومنٹ پر دستخط کر رہے ہیں، کیوں کہ یہ آرٹیفیشل نہیں ہے۔ ہم سب اس بات سے متفق ہیں۔ ہم اس کا نام تبدیل کرکے ’سپر انٹیلیجنس‘ کرنے جا رہے ہیں، اور آفیشیل طور پر اس کا نام تبدیل کیا جا رہا ہے۔

 اس میٹنگ میں میٹا کے سی ای او مارک زکربرگ، گوگل کے سی ای او سندر پچائی، ایلن مسک اور دیگر بڑی ٹیک کمپنیوں کے سربراہان شامل ہوئے تھے۔ اس میٹنگ میں سبھی نے متحد ہو کر ’آرٹیفیشل انٹیلیجنس‘ (اے آئی) کا نام تبدیل کر کے ’سپر انٹیلیجنس‘ کرنے کا فیصلہ لیا ہے۔ ڈونالڈ ٹرمپ نے کہا کہ یہ اے آئی نہیں ہے۔ ہم نے آفیشیل طور پر اس کا نام تبدیل کر کے ’ایس آئی‘ کر دیا ہے۔ اس کا مطلب ’سپر انٹیلیجنس‘ آفیشیلی نیا نام ہو گیا ہے۔

دستخط کیے گئے کاغذات میں کہا گیا ہے کہ فیڈرل حکومت کو ایسی اصطلاحات کا استعمال کرنا چاہئے، جو ان ٹیکنالوجی کی تبدیلی کی صلاحیت اور امریکی عوام کے لیے اس سے پیدا ہونے والے لامحدود مواقع دکھائے۔ اس لیے سپر انٹیلیجنس لفظ ٹیکنالوجی کے وعدے، طاقت اور تیزی سے بڑھتی صلاحیتوں کو بہتر طریقے سے بتاتا ہے۔ اس لیے میری انتظامیہ کی یہ پالیسی ہے کہ قانون کے دائرے میں رہ کر ایگزیکٹو برانچ آرٹیفیشل انٹیلیجنس اور اے آئی کے بجائے سپر انٹیلیجنس اور ایس آئی کی اصطلاحات استعمال کرے گی اور کسی بھی قابل اطلاق حالات میں آرٹیفیشل انٹیلیجنس اور اے آئی کی اصطلاحات کے استعمال کو تسلیم نہیں کرے گی۔