’اقوام متحدہ کی پہلے سے کہیں زیادہ ضرورت‘ یو این کے 81 ویں یوم تاسیس کے موقع پر انتونیو گوٹیرس کا اظہار خیال

اقوام متحدہ کے سکریٹری جنرل انتونیو گوٹیرس نے عالمی چیلنجز کے حل، امن و سلامتی کو فروغ دینے اور انسانی حقوق کے تحفظ میں اقوام متحدہ کی اہمیت کو ایک بار پھر اجاگر کیا۔ ہفتے کے روز انہوں نے کہا کہ اپنی 81 ویں سالگرہ منا رہی اس تنظیم کی آج پہلے سے کہیں زیادہ ضرورت ہے۔ اپنے پیغام میں گوٹیرس نے تنازعات کو سفارت کاری اور بین الاقوامی قوانین کے ذریعے حل کرنے، غربت اور بھوک سے لڑنے، انسانی حقوق کو فروغ دینے اور تنازعات، آفات اور نقل مکانی سے متاثرہ افراد تک انسانی امداد پہنچانے میں اقوام متحدہ کے طویل عرصے سے جاری کردار پر روشنی ڈالی۔

’ایکس‘ پر اقوام متحدہ کے سربراہ نے کہا کہ یہ تنظیم لوگوں کی خدمت کرنے، اپنی صلاحیت کو مضبوط بنانے اور موجودہ دور کے چیلنجز کا سامنا کرنے کے لیے کام جاری رکھے گی۔ گوتریس نے لکھا کہ 81 برسوں سے اقوام متحدہ سفارت کاری اور قوانین کے ذریعے تنازعات کو حل کرتا آرہا ہے، غربت اور بھوک کے خاتمے کے لیے کام کر رہا ہے۔ آج اقوام متحدہ کی پہلے سے کہیں زیادہ ضرورت ہے۔ ہم لوگوں کی بہتر خدمت کرنے اور اپنے دور کے چیلنجز کا سامنا کرنے کے لیے اقوام متحدہ کو مضبوط کرنے کا کام جاری رکھیں گے۔

یوم اقوام متحدہ کے موقع پر ایک ویڈیو پیغام میں سکریٹری جنرل نے کہا کہ یہ موقع صرف ایک بین الاقوامی تنظیم کے جشن منانے کا نہیں ہے، بلکہ یہ موقع انسانیت کو برقرار رکھنے کے تصور کو زندہ رکھنے کی ترغیب بھی دیتا ہے۔ انہوں نے کہا کہ یوم اقوام متحدہ کے موقع پر ہم صرف ایک ادارے کا نہیں، بلکہ ایک نظریے کا جشن مناتے ہیں۔ انسانیت کا مستقبل اس بات پر منحصر ہے کہ ہم امن، ترقی اور انسانی حقوق کو فروغ دینے کے لیے مل کر کتنا کام کرتے ہیں۔ 81 برسوں سے اقوام متحدہ نے اس سوچ کو حقیقت میں بدلا ہے۔ ہتھیاروں کے بجائے سفارت کاری اور قوانین کے ذریعے تنازعات کو حل کرکے زندگی بچائی ہے۔

گوٹیرس نے مزید کہا کہ نقل و حمل، تجارت اور ٹیکنالوجی سے لے کر لوگوں اور ہمارے سیارے کا تحفظ ہماری ذمہ داری ہے۔ عالمی سطح پر تمام ممالک کو یکساں آواز دینے تک، اقوام متحدہ ہماری دنیا کے تانے بانے کا ایک ناگزیر حصہ ہے۔ اور آج اس کی پہلے سے کہیں زیادہ ضرورت ہے۔ گوٹیرس نے صنفی مساوات کو فروغ دینے اور خواتین و لڑکیوں کے لیے مواقع بڑھانے میں تنظیم کے کردار پر بھی زور دیا۔ یوم اقوام متحدہ ہر سال 24 اکتوبر کو منایا جاتا ہے۔ یہ دن 1945 میں اقوام متحدہ کے چارٹر کے نافذ ہونے کی یاد دلاتا ہے۔ اسی تاریخ کو اقوام متحدہ کا باضابطہ قیام عمل میں آیا تھا، جب اس کے بنیادی دستاویز کو دستخط کرنے والے ممالک کی ضروری اکثریت نے منظوری دے دی تھی۔ ان ممالک میں سلامتی کونسل کے 5 مستقل ارکان بھی شامل تھے۔