طالبان کل جمعہ کی نماز کے بعد افغانستان میں کر سکتا ہے حکومت سازی کا اعلان

افغانستان پر پوری طرح سے قبضہ کر لینے اور امریکہ کے وہاں سے نکل جانے کے بعد اب طالبان ملک میں نئی حکومت بنانے کے لیے پوری طرح سے تیار ہے۔ خبر ہے کہ طالبان کل جمعہ کی نماز کے بعد ملک میں نئی حکومت تشکیل دینے کا اعلان کرے گا۔ ایسی بھی خبریں سامنے آ رہی ہیں کہ طالبان کے سرکردہ لیڈر ہبت اللہ اخندزادہ ملک کی قیادت کریں گے۔

حالانکہ حکومت کی شکل و شباہت کیا ہوگی، اور قیادت کون کرے گا، اس پر فی الحال کوئی واضح تصویر سامنے نہیں آئی ہے۔ لیکن امکان ظاہر کیا جا رہا ہے کہ طالبان کے سرکردہ لیڈر ہبت اللہ اخندزادہ ہی ملک کے سپریم لیڈر ہوں گے اور حکومت کی شکل ایرانی نظام حکومت سے ملتی جلتی ہوگی، جس میں کہ ایک سپریم لیڈر ہوگا او راس کے ماتحت صدر، وزیر اعظم اور دیگر سبھی عہدے آئیں گے۔ گزشتہ ہفتہ طالبان کے ایک سینئر افسر نے بھی اسی طرح کا اشارہ دیا تھا۔

قابل ذکر ہے کہ طالبان نے اس ہفتے امریکی فوج کی واپسی سے پہلے ہی 15 اگست کو راجدھانی کابل پر قبضہ کرنے کے ساتھ پورے افغانستان کو اپنے کنٹرول میں لے لیا تھا۔ اب طالبانی لیڈر ملک کو چلانے کے لیے وہاں حکومت تشکیل دینے پر غور کر رہے ہیں۔ اس کے ساتھ ہی طالبان کے کئی عہدیدار دیگر ممالک کے ساتھ مستقبل میں رشتوں کو لے کر بھی غور کر رہے ہیں۔

حالانکہ یہ بھی سچ ہے کہ طالبان اب ایک ایسے ملک پر حکومت کر جا رہا ہے جو بین الاقوامی امداد پر منحصر ہے، کیونکہ ملک کی معاشی حالت بے حد خستہ ہے۔ ایسے میں طالبان بھی بین الاقوامی امداد کنندگان اور سرمایہ کاروں سے رشتے بہتر رکھنا چاہتا ہے۔ اس کے لیے طالبان نے ان سبھی غیر ملکیوں کے نکلنے کے لیے محفوظ راستہ دینے کا وعدہ کیا ہے جو ائیرلفٹ کے دوران نہیں نکل سکے تھے۔ کابل ائیرپورٹ کو پھر سے شروع کرنے کے لیے ترکی اور قطر سے بات چیت جاری ہے۔