لی جے میونگ جنوبی کوریا کے نئے صدر ہوں گے

جنوبی کوریا میں 3 جون 2025 کو ہونے والے خصوصی صدارتی انتخابات میں لبرل پارٹی کے امیدوار لی جے میونگ نے بڑی کامیابی حاصل کی ہے۔ انہیں اپنے مخالف کم مون سو کے خلاف واضح کامیابی ملی ہے۔ قدامت پسند رہنما کم مون سو نے بھی اپنی شکست تسلیم کر لی ہے۔

یہ انتخاب اس غیر معمولی سیاسی بحران کے بعد ہوا جس میں سابق صدر یون سک یول نے دسمبر 2024 میں مارشل لاء لگانے کی کوشش کی تھی، جنہیں بعد میں مواخذے کا سامنا کرنا پڑا تھا۔ یون نے اپنی پانچ سالہ مدت کے وسط میں 3 دسمبر 2024 کو مارشل لاء کا اعلان کیا، جس نے نہ صرف جنوبی کوریا بلکہ پوری دنیا کو چونکا دیا تھا۔ 1987 میں جمہوریت کی بحالی کے بعد یہ پہلا موقع تھا کہ کسی صدر نے ایسا قدم اٹھایا۔

یون کے فیصلے نے ملک بھر میں احتجاج اور سیاسی ہلچل کو جنم دیا۔ پارلیمنٹ میں مواخذے کی تحریک منظور کرتے ہوئے صدر کو عہدے سے ہٹا دیاگیا تھا۔ اپریل 2025 میں، آئینی عدالت نے یون کو باضابطہ طور پر عہدے سے ہٹا دیا، جس کے بعد ان کے خلاف غداری اور اختیارات کے ناجائز استعمال کے الزامات کے تحت فوجداری مقدمات شروع ہوئے۔

اس سیاسی ہنگامہ آرائی کی وجہ سے جون 2025 میں خصوصی صدارتی انتخابات ہوئے، جس میں یون سک یول لڑنے کے لیے نااہل ہو گئے۔ لی جے میونگ نے اپنی مہم کو یون اور اس کی قدامت پسند پیپلز پاور پارٹی کی ناکامیوں کے خلاف "عوام کے فیصلے کا دن" قرار دیا۔ انتخابات میں تقریباً 80 فیصد ووٹ ڈالے گئے جو کہ 1997 کے بعد سب سے زیادہ ہے۔

لی جے میونگ نے وعدہ کیا ہے کہ وہ ملک میں اتحاد، اقتصادی بحالی اور شمالی کوریا کے ساتھ امن قائم کرنے پر توجہ دیں گے۔ ان کی جیت کو یون کے متنازعہ فیصلوں کے خلاف مینڈیٹ اور قدامت پسند پارٹی کی ناکامی کے طور پر دیکھا جا رہا ہے۔ یون حکومت میں وزیر محنت رہ چکے کم مون سو نے اپنی شکست تسلیم کرتے ہوئے لی کو جیت پر مبارکباد دی ہے۔