سویڈن قرآن کی توہین کرنے والے کو مسلم ممالک کے حوالے کرے: خامنہ ای

ایران کے سپریم لیڈر علی خامنہ ای نے ہفتہ کو سویڈن کی حکومت سے کہا کہ حال ہی میں قرآن کی توہین کرنے کے مجرم کو مسلم ممالک کے عدالتی نظام کے حوالے کرے۔

مسٹر خامنہ ای کی ویب سائٹ پر شائع ہونے والے ایک بیان کے مطابق، انہوں نے سویڈن میں قرآن کی "تلخ، سازشی اور خطرناک" بے حرمتی کی مذمت کرتے ہوئے یہ تبصرہ کیا۔انہوں نے کہا کہ تمام مسلم علماء اس بات پر متفق ہیں کہ مجرم کو "سخت سزا" دی جانی چاہیے۔

قابل ذکر ہے کہ جمعرات کو ایک عراقی پناہ گزین نے گزشتہ ماہ قرآن مجید کا نسخہ جلایا تھا اورسویڈن کے دارالحکومت اسٹاک ہوم میں ایک مظاہرے کے دوران ایک بار پھر مقدس کتاب کی بے حرمتی کی تھی۔

واضح رہے سویڈن میں گزشتہ ماہ قرآن کے صفحات نذر آتش کیے جانے کے معاملے پر پاکستان کی درخواست پر جنیوا میں اقوام متحدہ کی انسانی حقوق کونسل میں ہنگامی بحث ہوئی۔ جس میں پاکستان، سعودی عرب اور ایران سمیت متعدد مسلم ملکوں نے بعض یورپی اور دیگر ملکوں میں قرآن کی بے حرمتی کے بڑھتے ہوئے واقعات کو مذہبی منافرت کو ہوا دینے کے مترادف قرار دیا۔

پاکستان کی طرف سے پیش کردہ تحریک پر اقوام متحدہ کے حقوق انسانی کے سربراہ سے رپورٹ طلب کی گئی اور ریاستوں سے مطالبہ کیا گیا کہ "وہ ایسے خلاء کو ختم کریں جو مذہبی منافرت کی وکالت اور قانونی کارروائی میں رکاوٹ بن سکتے ہیں۔" سویڈن میں ایک عراقی تارک وطن نے گزشتہ ماہ دارالحکومت اسٹاک ہولم کی ایک مسجد کے باہر قرآن کے صفحات کو نذر آتش کردیا تھا، جس سے پوری مسلم دنیا میں غم و غصہ پھیل گیا اور کئی پاکستان سمیت متعدد ملکوں میں احتجاجی مظاہرے ہوئے۔