کیتھے پیسفک ایئرویز نے بھی اسرائیل کے لیے اپنی پروازوں کو بند کرنے کا کیا اعلان

اسرائیل اور حماس کے درمیان جاری جنگ نے دیگر ممالک کے لیے بھی کئی طرح کی پریشانیاں کھڑی کر دی ہیں۔ ان مشکل حالات میں اب تک کئی فضائی کمپنیوں نے اپنی پروازوں کو بند کرنے کا اعلان کیا ہے۔ ان میں اب مزید ایک فضائی کمپنی کا نام جڑ گیا ہے۔ ہانگ کانگ کی معروف فضائی کمپنی کیتھے پیسفک ایئرویز لمیٹڈ نے اسرائیل میں جاری جنگ کے پیش نظر ہانگ کانگ اور تل ابیب کے درمیان اپنی پروازوں کو منسوخ کرنے کا اعلان کیا ہے۔

بین الاقوامی خبر رساں ایجنسی سے موصول ہو رہی خبروں کے مطابق کیتھے پیسفک ائیرویز کے ترجمان کی جانب سے ہانگ کانگ اور تل ابیب کے درمیان سبھی پروازوں کی منسوخی کا اعلان کیا گیا ہے۔ ایسا اسرائیل میں غیر یقینی حالات کو دیکھتے ہوئے کیا گیا ہے اور پروازوں کی منسوخی رواں سال کے اختتام تک رہے گی۔ ترجمان نے کہا ہے کہ ’’کیتھے کے جن مسافروں نے پہلے سے ان شہروں کے درمیان آنے جانے کے لیے 31 مارچ 2024 تک کے سفری ٹکٹ لے رکھے ہیں وہ نئی تاریخوں کے لیے اپنی بکنگ کی تجدید کرا سکتے ہیں۔‘‘

قابل ذکر ہے کہ کیتھے پیسفک نے اس سے پہلے اکتوبر ماہ کے شروع میں بھی ایک بار پروازیں روک دی تھیں۔ پراوزوں میں یہ رکاوٹ حماس کے اسرائیل پر حملوں کے بعد پیدا ہوئی تھی۔ غور کرنے والی بات یہ ہے کہ خطے میں امن و امان کی بگڑی ہوئی حالت کو دیکھتے ہوئے تل ابیب آنے والے مسافروں کی تعداد میں بھی غیر معمولی کمی ہو چکی ہے۔ سات اکتوبر سے مسلسل اسرائیلی فضائیہ کے طیارے غزہ پر بمباری کے لیے اڑ رہے ہیں اور اسرائیل پر حماس کے راکٹ حملوں کا بھی ہر وقت اندیشہ رہتا ہے۔