بنگلہ دیش نے ہندوستان سے اپنے دو سفارت کاروں کو واپس بلا لیا

ہندوستان اور بنگلہ دیش کے درمیان کشیدگی بڑھتی جا رہی ہے۔ ایسے میں بنگلہ دیش کی یونس حکومت نے ہندوستان سے اپنے دو سفارت کاروں کو واپس بلا لیا ہے۔ اگرتلہ، تری پورہ میں بنگلہ دیش کے اسسٹنٹ ہائی کمیشن پر حملے اور کولکتہ میں بنگلہ دیش کے ڈپٹی ہائی کمیشن کے سامنے احتجاج کے بعد بنگلہ دیش نے ان دونوں سفارت کاروں کو فوری طور پر ڈھاکہ واپس بلا لیا ہے۔

حال ہی میں تریپورہ کے دارالحکومت اگرتلہ میں بنگلہ دیش کے سفارتی مشن میں توڑ پھوڑ کی گئی۔ اس معاملے میں 7 لوگوں کو گرفتار کیا گیا۔ کیمپس میں گھسنے کے معاملے میں 4 پولیس اہلکاروں کے خلاف بھی کارروائی کی گئی۔ ساتھ ہی بنگلہ دیش میں ہندوستانی ہائی کمشنر کو طلب کرکے واقعے پر شدید احتجاج کیا گیا۔ اس کے علاوہ بنگلہ دیش نے اگرتلہ میں اپنی قونصلر سروس بند کرنے کا اعلان کیا تھا۔ اب بنگلہ دیش نے تریپورہ سے اپنے سفارت کار کو واپس بلا لیا ہے۔

بنگلہ دیش کی وزارت خارجہ کے ذرائع نے تصدیق کی ہے کہ بنگال کے سفارت کار بنگلہ دیش واپس پہنچ گئے ہیں جبکہ تریپورہ کے اسسٹنٹ ہائی کمشنر کی بھی ڈھاکہ واپسی متوقع ہے۔ ذرائع نے بتایا کہ کولکتہ میں بنگلہ دیش کے قائم مقام ڈپٹی ہائی کمشنر شکدار محمد اشرف الرحمان اور تریپورہ میں اسسٹنٹ ہائی کمشنر عارف الرحمان کو گزشتہ منگل کو ہنگامی بنیادوں پر ڈھاکہ واپس جانے کی ہدایت کی گئی تھی۔