ڈالٹن گنج: جھارکھنڈ کے پلامو ضلع میں چھتر پور تھانہ علاقہ کے مسیہانی واقع الہ آباد بینک کی شاخ سے نقاب پوش بدمعاشوں نے دن دہاڑے ڈھائی لاکھ روپے لوٹ لئے۔
پولس ذرائع نے یہاں بتایاکہ چھ ۔ سات کی تعداد میں نقاب پوش بدمعاش بینک کی شاخ میں آئے اور اسلحہ کے زور پر کیشیئر ہریشور تیواری اور شاخ منیجر رومن ٹوپی کو قبضے میں لیکر کیش کاؤنٹر پر سے ڈھائی لاکھ روپے لوٹ کر فرار ہو گئے ۔
ذرائع نے بتایاکہ اطلاع ملتے ہی موقع پر پہنچے چھتر پور کے سب ڈویژنل پولیس افسر ( ایس ڈی پی او ) شمبھو سنگھ ، تھانہ انچارج واسو دیو منڈا سمیت دیگر پولیس افسران نے معاملے کی جانچ شروع کر دی ہے ۔ سی سی ٹی وی فوٹیج کو کھنگالا جارہا ہے لٹیروں کی شناخت کیلئے پولیس کوشش کر رہی ہے ۔
ایس ڈی پی او نے بتاییاکہ لٹیروںکو پکڑنے کیلئے بہار کے سرحدی علاقوں میں جانچ مہم تیز کر دی گئی ہے ۔ واقعہ کے وقت بینک میں کوئی کسٹمر موجود نہیںتھا۔ کوئی بینک ملازم زخمی نہیںہوا ہے ۔ انہوںنے بتایاکہ سی سی ٹی وی کی مدد سے بدمعاشوں کی شناخت کی جارہی ہے ۔ لٹیروںکی جلد ازجلد گرفتار ی کرلی جائے گی ۔
Published: 22 May 2019, 9:09 AM IST
سری نگر: نیشنل کانفرنس نے ہندوستان اور پاکستان پر زور دیا کہ دونوں پڑوسی تعطل کے شکار مذاکراتی عمل کو دوبارہ بحال کرنے کے لئے ٹھوس اقدامات کریں اور مسئلہ کشمیر سمیت تمام حل طلب معاملات کو بات چیت کے ذریعے حل کرنے کی راہیں تلاش کریں۔
این سی کے معاون جنرل سکریٹری ڈاکٹر شیخ مصطفی کمال نے بدھ کے روز یہاں پارٹی عہدیداورں اور کارکنوں کے ایک اجلاس سے خطاب کرتے ہوئے کہا کہ نئی دلی میں جو بھی حکومت معرض وجود آئے گی اُسے پاکستان میں عمران خان کی سربراہی والی حکومت کے ساتھ امن عمل کو آگے لے جانا چاہئے اور خطے میں امن و خوشحالی کی داغ بیل ڈالنی چاہئے۔
انہوں نے کہا کہ دونوں ممالک مذاکراتی عمل میں مسئلہ کشمیر سرفہرست رکھ کر اس پیچیدہ مسئلہ کا کوئی قابل قبول حل تلاش کریں جو سبھی کے لئے قابل قبول ہو، ایسا حل جو ریاست جموں و کشمیر کے عوام کے جذبات کی ترجمانی کرتا ہو کیونکہ یہاں کے عوام ہی اس مسئلے کے حقیقی اور اصل فریق ہیں۔
Published: 22 May 2019, 9:09 AM IST
نئی دہلی: کمیونسٹ پارٹی آف انڈیا (سی پی ایم) کے سکریٹری اتل کمار انجان نے بدھ کو کہا ہے کہ لوک سبھا انتخابات کے دوران اور بعد میں الیکٹرونک ووٹنگ مشینیں (ای وی ایم) کے ساتھ ہوئی چھیڑ چھاڑ اور اسے مشتبہ حالت میں ایک جگہ سے دوسری جگہ منتقل کرنا جمہوریت کے لئے سنگین چیلنج بن گیا ہے۔اتل انجان نے یہاں جاری بیان میں کہا ہے کہ انتخابات غیر جانبدار ہی نہیں بلکہ انتخابی کمیشن کو یہ دیکھنا چاہئے کہ انتخابات غیرجانبدار ہونے پر عوام کو اعتماد بھی ہو۔ آج کے دور میں جس طریقے سے انتخابی کمیشن کی خاموشی کئی نقطوں پر ہے اس کو دیکھ کر لگتا ہے کہ کمیشن اپنی اہمیت پر ذرا بھی فکرمند نہیں ہے۔
سی پی آئی لیڈر نے کہا ہے کہ اگر اپوزیشن حکومت کی پالیسیوں سے متفق نہیں ہوتی ہے تو وہ پارلیمنٹ اور اسمبلیوں کی میٹنگوں سے باہر ہوجاتی ہے۔ وقتاً فوقتاً اہم موضوعات پر حکومت کے ذریعہ اپوزیشن کے لیڈروں کو میٹنگ پر بلانے پر اپوزیشن اس کا بھی بائیکاٹ کردیتی ہے۔ کہیں ایسا نہ ہو کہ جس طرح سے انتخابی کمیشن اپنی سرگرمی چلا رہی ہے آنے والے وقت میں اپوزیشن انتخابی کمیشن کی میٹنگ کا بائیکاٹ نہ کردیں۔ اس کا دھیان انتخابی کمیشن کو رکھنا چاہیے۔
Published: 22 May 2019, 9:09 AM IST
جموں: جموں و کشمیر کے ضلع پونچھ میں لائن آف کنٹرول کے مینڈھر سیکٹر میں بدھ کو ہونے والے ایک پراسرار دھماکے میں ایک فوجی اہلکار ہلاک جبکہ دیگر دو زخمی ہوگئے۔ یہ دھماکہ اس وقت ہوا جب فوجی اہلکاروں کی ایک ٹیم علاقہ میں گشت کر رہی تھی۔
ذرائع نے بتایا کہ جوں ہی فوجی اہلکار مینڈھر سیکٹر میں ڈھیری ڈبسی نامی جگہ پر پہنچے تو وہاں ایک زوردار دھماکہ ہوا جس کے نتیجے میں تین فوجی اہلکار زخمی ہوئے۔ انہوں نے بتایا کہ زخمیوں کو فوری طور پر نزدیکی اسپتال لے جایا گیا جہاں ایک فوجی زخموں کی تاب نہ لاتے ہوئے دم توڑ بیٹھا۔
ایک سیکورٹی عہدیدار نے بتایا کہ دھماکے کی اصل وجہ جاننے کی کوششیں جاری ہیں۔ انہوں نے بتایا کہ زخمی اہلکاروں کو بہتر علاج ومعالجہ کے لئے فوجی اسپتال منتقل کیا گیا ہے۔
دریں اثنا فوج کی طرف سے جاری ایک بیان میں کہا گیا کہ مینڈھر سیکٹر میں بدھ کی صبح قریب نو بجکر 15 منٹ پر تربیتی عمل کے دوران ایک فوجی اہلکار شدید طور پر زخمی ہوا جو بعد ازاں زخموں کی تاب نہ لاتے ہوئے دم توڑ بیٹھا۔
بیان میں مزید کہا گیا 'مزید دو زخمیوں کو علاج و معالجہ کے لئے ملٹری اسپتال میں داخل کرایا گیا ہے جہاں ان کی حالت مستحکم ہے'۔
Published: 22 May 2019, 9:09 AM IST
23 مئی کو لوک سبھا انتخاب کے نتائج برآمد ہونے ہیں اور اس کے پیش نظر پورے ملک میں جہاں جہاں کاؤنٹنگ سنٹرس بنائے گئے ہیں وہاں سیکورٹی کے سخت انتظامات دیکھنے کو مل رہے ہیں۔ اتر پردیش، مغربی بنگال، بہار، اڈیشہ، مہاراشٹر سمیت سبھی ریاستوں میں انتظامیہ نے سخت پہرہ لگا رکھا ہے۔ کوئی ناخوشگوار واقعہ سرزد نہ ہو اس کے لیے بھی تیاریاں کر لی گئی ہیں۔ بہار میں اے این کالج (پٹنہ) میں ووٹوں کی گنتی ہونی ہے اور یہاں پر سخت پہرہ دیکھنے کو مل رہا ہے۔ ذرائع کے مطابق اے این کالج کو جوڑنے والی سبھی سڑکوں پر آمد و رفت بند کر دیا گیا ہے۔
Published: 22 May 2019, 9:09 AM IST
انتخابی کمیشن کے ذریعہ وی وی پیٹ کو لے کر دیے گئے فیصلے پر سی پی ایم جنرل سکریٹری سیتا رام یچوری نے سوال کھڑے کیے ہیں۔ انھوں نے کہا کہ انتخابی کمیشن کا یہ فیصلہ سپریم کورٹ کے حکم کے خلاف ہے۔ انھوں نے کہا کہ اگر انتخابی عمل کی سالمیت کے لیے اس عمل کو اتنا طویل کھینچا گیا ہے تو انتخابی کمیشن پہلے نمونے کے ٹیسٹ کے حقیقی اصولوں پر عمل کیوں نہیں کر رہا ہے؟ یچوری نے ٹوئٹ کر کہا کہ وی وی پیٹ کی پرچیوں کا ملان بھی صبح ووٹوں کی گنتی کے ساتھ شروع ہونا چاہیے۔ اگر ایسا نہیں ہوتا ہے تو نظامِ قانون کی حالت بگڑ سکتی ہے۔
Published: 22 May 2019, 9:09 AM IST
بہار کے بھوجپور ضلع کے کرشنا گڑھ تھانہ حلقہ میں ایک ٹھیلہ سے گول گپّا کھانے کے بعد 30 سے زائد لوگ بیمار ہو گئے ہیں۔ بیمار ہونے والوں میں بچوں اور خواتین کی تعداد زیادہ ہے۔ کرشنا گڑھ تھانہ انچارج منوج کمار نے بدھ کے روز بتایا کہ ’’پدمنیا گاوٌں کے کچھ لوگوں نے منگل کی شام ایک ٹھیلے سے گول گپّے خرید کر کھائے تھے۔ گول گپّے کھانے کے کچھ ہی دیر کے بعد سبھی لوگوں کی طبیعت بگڑنے لگی۔ ایک ایک کر گاؤں کے 30 سے 35 لوگوں کی طبیعت خراب ہو گئی۔ لوگ الٹی اور پیٹ درد کی شکایت کرنے لگے۔‘‘
منوج کمار کا کہنا ہے کہ آناً فاناً میں سبھی کو آرہ صدر اسپتال میں داخل کرایا گیا ہے جہاں علاج کے بعد سبھی لوگوں کی حالت معمول پر بنی ہوئی ہے۔ کمار نے بتایا کہ حالت میں بہتری ہونے کے بعد اسپتال سے زیادہ تر متاثرین کو چھٹی دے دی گئی۔ پولس گاؤں میں پہنچ کر معاملے کی چھان بین کر رہی ہے۔
Published: 22 May 2019, 9:09 AM IST
کانگریس صدر راہل گاندھی نے ٹوئٹ کر کہا ہے کہ ’’کانگریس پارٹی کے معزز کارکنان، آئندہ 24 گھنٹے اہم ہیں۔ محتاط اور مستعد رہیں۔ خوفزدہ نہ ہوں۔ آپ سچائی کے لیے لڑ رہے ہیں۔ فرضی ایگزٹ پول کی غلط تشہیر سے مایوس نہ ہوں۔ خود پر اور کانگریس پارٹی پر بھروسہ رکھیں، آپ کی محنت بے کار نہیں جائے گی۔ جے ہند۔‘‘
Published: 22 May 2019, 9:09 AM IST
اڈیشہ کے کالاہانڈی میں این ایچ-26 پر اندوہناک سڑک حادثہ پیش آیا ہے۔ یہاں پر کار اور ٹرک کے ٹکر میں ایک ہی کنبہ کے 5 افراد کی موت ہو گئی۔ اس حادثہ میں دو لوگ سنگین طور پر زخمی بھی ہوئے ہیں۔ زخمیوں کو قریب کے اسپتال میں داخل کرایا گیا ہے۔
Published: 22 May 2019, 9:09 AM IST
ملک بھر میں ای وی ایم کی ہیرا پھیری کی خبروں کے درمیان ایس پی اور بی ایس پی کارکنان مستعد ہو گئے ہیں۔ اتر پردیش کے میرٹھ میں ایس پی-بی ایس پی کارکنان نے اسٹرانگ روم کے باہر تمبو لگا دیا ہے اور 24 گھنٹے دوربین سے اسٹرانگ روم کی نگرانی کر رہے ہیں۔
Published: 22 May 2019, 9:09 AM IST
جموں و کشمیر کے کلگام کے گوپال پورا میں سیکورٹی فورسز سے تصادم میں اب تک دو ملی ٹینٹس ہلاک ہو چکے ہیں۔ سیکورٹی فورسز اور ملی ٹینٹس کے درمیان تصادم اب بھی جاری ہے۔
Published: 22 May 2019, 9:09 AM IST
دہلی میں ایک دردناک واقعہ پیش آیا جس میں دو مزدور ہلاک ہو گئے۔ دراصل لارینس روڈ واقع ایک آٹا چکّی کے ٹینک کے اندر پھنسنے کی وجہ سے ان مزدوروں کی موت ہوئی۔ فائر بریگیڈ دستہ کے ایک رکن نے بتایا کہ یہ ٹینک کافی دنوں سے بند پڑا تھا جس کی صفائی کے لیے مزدور اندر گئے تھے لیکن وہیں پھنس گئے اور ان کی موت ہو گئی۔ فائر بریگیڈ رکن کا یہ بھی کہنا ہے کہ ٹینک کافی دنوں سے بند رہنے کے سبب شاید اس میں زہریلی گیس پیدا ہو گئی ہو اور مزدور اسی وجہ سے ہلاک ہو گئے ہوں۔
Published: 22 May 2019, 9:09 AM IST
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
Published: 22 May 2019, 9:09 AM IST
تصویر: پریس ریلیز