رافیل ڈیل کے معاملہ پر سپریم کورٹ کل فیصلہ سنائے گا۔ سپریم کورٹ کی تین ججوں کی بنچ اس امر پر فیصلہ سنائے گی کہ آیا اس معاملہ کی جانچ ایس آئی ٹی سے کرائی جائے یا نہیں۔ واضح رہے کہ اس معاملہ میں سپریم کورٹ نے 14 نومبر کو فیصلہ محفوظ رکھا تھا۔
Published: 13 Dec 2018, 9:10 AM IST
بہار میں مظفر پور شیلٹر ہوم کو منہدم کرنے کی کارروائی شروع ہو گئی ہے۔ شیلٹر ہوم میں 30 بچیوں کے ساتھ عصمت دری کا معاملہ سامنے آنے کے بعد سپریم کورٹ اس معاملے میں بہت سخت نظر آ رہا ہے اور یہ کارروائی اسی کا نتیجہ ہے۔ ٹاٹا انسٹی ٹیوٹ آف سوشل سائنسز کی رپورٹ کے بعد پورے ملک میں مظفر پور شیلٹر ہوم معاملہ پر ہنگامہ برپا ہو گیا تھا۔ عدالت کے دباؤ کے بعد پولس نے اہم ملزم برجیش ٹھاکر کو گرفتار کر لیا تھا۔ فی الحال وہ جیل میں ہے اور سی بی آئی پورے معاملے کی جانچ کر رہی ہے۔
Published: 13 Dec 2018, 9:10 AM IST
سینئر کانگریس لیڈر ڈاکٹر کرن سنگھ نے اتر پردیش کے وزیر اعلیٰ یوگی آدتیہ ناتھ کو ایک خط لکھا ہے جس میں انھوں نے گزارش کی ہے کہ رام جی کی دیو ہیکل مورتی کے ساتھ سیتا جی کی مورتی بھی تعمیر کی جائے۔ ڈاکٹر کرن سنگھ نے اپنے خط میں اس تعلق سے تفصیل سے لکھا ہے اور کہا ہے کہ ’’ایودھیا میں شری رام کی دیو ہیکل مورتی بنانے کا فیصلہ لے ہی لیا گیا ہے تو میری گزارش ہے کہ اس کی اونچائی نصف کر کے رام اور سیتا دونوں کی ایک ساتھ مورتی بنائی جائے تاکہ ہزاروں سال بعد سیتا جی کو ایودھیا میں مناسب جگہ مل سکے۔‘‘
Published: 13 Dec 2018, 9:10 AM IST
پارلیمنٹ پر حملے کی آج 17ویں برسی ہے۔ 13 دسمبر 2011 کو ہندوستانی پارلیمنٹ پر 50 مسلح دہشت گردوں نے حملہ کیا تھا اور اندھا دھند گولیاں چلائی تھیں۔ اس حملے کے دوران دہلی پولس کے جوان، پارلیمنٹ ہاؤس کے گارڈ سمیت کل 9 لوگ شہید ہو گئے تھے۔ بعد ازاں جوابی کارروائی کے بعد پانچوں دہشت گرد ہلاک ہو گئے تھے۔ اس حملے میں شہید ہوئے لوگوں کو آج پارلیمنٹ ہاؤس احاطہ میں یو پی اے چیئرپرسن سونیا گاندھی، کانگریس صدر راہل گاندھی، سابق وزیر اعظم منموہن سنگھ نے خراج عقیدت پیش کی۔ خراج عقیدت پیش کرنے والوں میں وزیر اعظم نریندر مودی، راج ناتھ سنگھ، امت شاہ، سشما سوراج، ارون جیٹلی وغیرہ بھی شامل تھے۔
Published: 13 Dec 2018, 9:10 AM IST
مہاراشٹر کے وزیر اعلیٰ دیویندر فڑنویس کے نام سپریم کورٹ نے نوٹس جاری کیا ہے۔ ان پر انتخابی حلف نامہ میں مجرمانہ معاملوں کی جانکاری چھپانے کا الزام عائد کیا گیا ہے۔ دراصل ستیش اُکڑے نامی ایک شخص نے عدالت میں ایک عرضی داخل کی ہے جس میں الزام عائد کیا گیا ہے کہ انھوں نے اپنے اوپر چل رہے دو مجرمانہ کیسوں کا تذکرہ 2014 انتخابات کے حلف نامہ میں نہیں کیا۔
Published: 13 Dec 2018, 9:10 AM IST
اسمبلی انتخابات کے نتائج برآمد ہوئے ابھی دو ہی دن ہوئے ہیں اور پٹرول کی قیمت میں اضافہ دیکھنے کو مل گیا ہے۔ تیل کمپنیوں نے قومی راجدھانی دہلی میں پٹرول کی قیمت میں فی لیٹر 9 پیسے کا اضافہ کیا ہے۔ اب ایک لیٹر پٹرول کی قیمت 70.29 روپے ہو گئی ہے۔ دلچسپ بات یہ ہے کہ گزشتہ تقریباً دو مہینوں میں پٹرول و ڈیزل کی قیمتوں میں یا تو کمی آئی تھی یا پھر وہ پہلے کی حالت پر ہی قائم رہی تھی۔ لیکن انتخابی نتیجہ برآمد ہونے کے دوسرے ہی دن اضافہ کو دیکھتے ہوئے سوشل میڈیا پر یہ باتیں کی جانے لگی ہیں کہ یہ قیمتیں انتخابات سے متاثر ہوتی ہیں۔
Published: 13 Dec 2018, 9:10 AM IST
ہندوستان کے مایہ ناز بلے باز روہت شرما اور گیندباز آر اشون کو آسٹریلیا کے خلاف دوسرے ٹیسٹ سے باہر کر دیا گیا ہے۔ پرتھ میں کھیلے جانے والے اس ٹیسٹ میچ میں روہت شرما کو پیٹھ کے نچلے حصے میں کھنچاؤ اور آر اشون کو پیٹ میں تکلیف کی وجہ سے باہر کیا گیا ہے۔ اس ٹیسٹ سے نوجوان بلے باز پرتھوی شا کو بھی باہر رکھا گیا ہے۔ ان کے باہر ہونے کی وجہ گھٹنے کی چوٹ ہے۔
Published: 13 Dec 2018, 9:10 AM IST
راجستھان کے جے پور سے کانگریس لیڈر اشوک گہلوت اور ریاستی صدر سچن پائلٹ دہلی کے لیے روانہ ہو چکے ہیں۔ دہلی میں دونوں لیڈران راہل گاندھی سے ملاقات کریں گے۔ خبروں کے مطابق راہل گاندھی دونوں لیڈروں سے ملاقات کے بعد ہی راجستھان کے وزیر اعلیٰ عہدہ کے لیے نام کا اعلان کریں گے۔
Published: 13 Dec 2018, 9:10 AM IST
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
Published: 13 Dec 2018, 9:10 AM IST