کسان تحریک کے دوران جان گنوانے والے کسانوں کو ڈیٹا نہیں ہونے کے حکومت کے بیان کا راہل گاندھی نے آج پریس کانفرنس کے دوران جواب دیا۔ حکومت پر حملہ بولتے ہوئے راہل گاندھی نے کہا کہ حکومت کہہ رہی ہے کہ ان کے پاس کسانوں کی موت کا ڈیٹا نہیں ہے لیکن ہمارے پاس جان گنوانے والے کسانوں کی فہرست موجود ہے اور حکومت چاہے تو فہرست وہ فراہم کر سکتے ہیں۔
خیال رہے کہ کسان تنظیمیں اور حزب اختلاف کی جماعتیں مسلسل حکومت سے کسانوں کے احتجاج کے دوران مارے گئے کسانوں کے اہل خانہ کو معاوضہ دینے کا مطالبہ کر رہے ہیں لیکن مرکزی حکومت نے پارلیمنٹ میں بتایا کہ ایک سال سے جاری کسانوں کے احتجاج کے دوران مرنے والے کسانوں کی تعداد کے بارے میں کوئی معلومات نہیں ہے، اس لیے معاوضے کا سوال ہی پیدا نہیں ہوتا۔
Published: 03 Dec 2021, 10:03 AM IST
گزشتہ روز پارلیمنٹ میں حکومت کی طرف سے دئے گئے بیان میں کہا گیا کہ کسان تحریک کے دوران جان گنوانے والے کسانوں کا ڈیتا موجود نہیں ہے۔ اس پر رد عمل ظاہر کرتے ہوئے کانگریس نے کہا کہ یہ حکومت کی بے حسی کی انتہا ہے۔
کانگریس پارٹی کے ٹوئٹر ہینڈل سے لکھا گیا، ’’ملک کے انداتا پر بی جے پی کے ظلم کے بعد شہید کسانوں کا ڈیٹا نہیں ہونا انداتا کی شہادت کی توہین ہے۔ بی جے پی اعداد و شمار نہ ہونے کی بات کہہ کر اپنی ذمہ داری سے بھاگنا بند کرے۔‘‘
کانگریس نے مزید کہا، ’’زرعی قوانین کے خلاف احتجاج کے دوران 700 سے زیاد کسان شہید ہوئے ہیں۔ بی جے پی حکومت شہید کسانوں کو معاوضہ دینے کے لئے شہید کسانوں کا کوئی ڈیٹا نہیں ہونے کا دعویٰ کر رہی ہے۔ بی جے پی حکومت اتنی بے حس کیوں ہیں؟‘‘
Published: 03 Dec 2021, 10:03 AM IST
کانگریس پارٹی نے جگدیش ٹھاکور کو گجرات کانگرین کا صدر مقرر کیا ہے۔ یہ عہدہ گجرات کانگریس کے سابق صدر امت چاوڑا کے استعفی دینے کے بعد سے خالی پڑا ہوا تھا۔ خیال رہے کہ گجرات میں اگلے سال اسمبلی انتخابات ہونے جا رہے ہیں اور اس کے لئے ریاستی تنظیم کو مضبوط کرنے کا عمل جاری ہے۔ اسی ضمن میں جگدیش ٹھاکور کو گجرات کانگریس کا صدر مقرر کیا گیا ہے۔
Published: 03 Dec 2021, 10:03 AM IST
ٹی ایم سی کی رکن پارلیمنٹ ڈولا سین نے حزب اختلاف کے ارکان پارلیمنٹ کی معطلی کے خلاف پارلیمنٹ میں دھرنے کے دوران کہا، ’’بی جے پی کے ایک وزیر نے گزشتہ روز کہا کہ این آر سی پورے ہندوستان میں نافذ نہیں ہوگا۔ انہوں نے تین زرعی قوانین کو واپس لیا ہے، وہ این آر سی کو بھی واپس لیں گے۔‘‘
Published: 03 Dec 2021, 10:03 AM IST
لوک سبھا میں کورونا بحران کے وقت آکسیجن کی کمی سے ہونے والی اموات کے سوال پر اپنے بیان کے دوران وزیر صحت منسکھ منڈاویا نے کہا کہ پنجاب کو چھوڑ کر جہاں 4 اموات کی اطلاع دی گئی، کسی بھی ریاست نے آکسیجن کی کمی سے موت کی اطلاع فراہم نہیں کی۔
انہوں نے کہا، ’’ہم نے تمام ریاستوں کو خط لکھ کر اس پر ڈیٹا طلب کیا تھا۔ 19 ریاستوں نے جواب دیا، صرف پنجاب میں آکسیجن کی کمی کی وجہ سے چار 'مشتبہ' اموات کی اطلاع دی گئی۔‘‘
Published: 03 Dec 2021, 10:03 AM IST
فضائی آلودگی کا معاملہ پر سماعت کے دوران یوپی حکومت نے سپریم کورٹ کو بتایا کہ صنعتوں کی بندش سے ریاست میں گنے اور دودھ کی صنعتیں متاثر ہو سکتی ہیں اور یوپی میں ہوا نیچے کی طرف ہے، ہوا زیادہ تر پاکستان سے آ رہی ہے۔ اس پر چیف جسٹس این وی رمنا نے طنز کرتے ہوئے کہا، تو کیا آپ پاکستان کی صنعتوں پر پابندی عائد کرنا چاہتے ہیں؟
Published: 03 Dec 2021, 10:03 AM IST
مرکزی وزارت صحت کے مطابق ہندوستان میں کورونا وائرس کے 9216 نئے معاملے رپورٹ ہوئے ہیں۔ اسی کے ساتھ ملک بھر میں کورونا کے فعال معاملوں کی تعداد 99976 رہ گئی ہے۔
Published: 03 Dec 2021, 10:03 AM IST
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
Published: 03 Dec 2021, 10:03 AM IST