کانگریس لیڈر راہل گاندھی پارلیمانی رکنیت ختم ہونے کے بعد مزید جارحانہ انداز میں سوال اٹھاتے ہوئے نظر آ رہے ہیں۔ سوشل میڈیا پر ایک بار پھر ویڈیو شیئر کر انھوں نے وزیر اعظم نریندر مودی سے تلخ سوالات پوچھے ہیں۔ ویڈیو کے ساتھ انھوں نے اپنے ٹوئٹر ہینڈل پر لکھا ہے ’’میں سچائی بولتا ہوں، ملک کی خاطر بولتا ہوں۔ اور آخری دم تک سچ کے راستے پر ہی چلوں گا۔ وزیر اعظم جی، بتائیے 20 ہزار کروڑ روپے کس کے ہیں؟‘‘
Published: 25 Mar 2023, 12:20 PM IST
مہاراشٹر میں ایک بار پھر کورونا انفیکشن نے لوگوں کو ڈرانا شروع کر دیا ہے۔ گزشتہ کچھ دنوں سے تازہ کیسز کی تعداد میں اضافہ دیکھنے کو مل رہا ہے اور تازہ ترین اطلاعات کے مطابق آج مہاراشٹر میں 437 نئے کیس درج کیے گئے ہیں۔ آج کورونا سے دو افراد کی موت کی بھی اطلاع حکومت نے دی ہے۔
Published: 25 Mar 2023, 12:20 PM IST
ہندوستان کی نوجوان خاتون باکسر نیتو گھنگھاس نے آج 48 کلوگرام وزن والی کیٹگری میں عالمی چمپئن کا خطاب اپنے نام کر لیا۔ ورلڈ باکسنگ چمپئن شپ میں انھوں نے منگولیا کی مکہ باز کو یکطرفہ مقابلہ میں 0-5 سے شکست دے کر طلائی تمغہ پر قبضہ کیا۔ اب وہ عالمی چمپئن بننے والی ہندوستان کی چھٹی مکہ باز بن گئی ہیں۔ اس سے قبل ایم سی میریکوم، سریتا دیوی، جینی، لیکھا کیسی، نکہت زریں یہ کمال کر چکی ہیں۔
Published: 25 Mar 2023, 12:20 PM IST
کھیلوں کے بین الاقوامی ادارہ ورلڈ اتھلیٹ نے ٹرانس جینڈر خواتین کو ٹریک اینڈ فیلڈ کے کھیل میں شامل ہونے پر پابندی لگا دی ہے۔ ورلڈ اتھلیٹ نے یہ فیصلہ ’فینا‘ یعنی ’انٹرنیشنل سوئمنگ فیڈریشن‘ کے فیصلے کی طرز پر لیا ہے۔ فینا ایک بین الاقوامی تیراکی ادارہ ہے۔ انٹرنیشنل سوئمنگ فیڈریشن نے گزشتہ سال جون میں ٹرانس جینڈر خواتین کو تیراکی میں شامل ہونے پر روک لگا دی تھی۔
Published: 25 Mar 2023, 12:20 PM IST
راہل گاندھی کی لوک سبھا رکنیت منسوخ کئے جانے کے خلاف کانگریس پارٹی نے ملک گیر تحریک کا اعلان کیا ہے۔ پارٹی لیڈر کے سی وینوگوپال نے بتایا ’’ہم کل سے ملک گیر تحریک چلانے کا منصوبہ بنا رہے ہیں۔ ہم کل صبح 10 بجے سے سنکلپ ستیہ گرہ شروع کریں گے۔ ملک بھر میں ہمارے پارٹی کارکنان تمام ریاستوں کے ہیڈکوارٹروں اور گاندھی کے مجسموں کے سامنے سنکلپ ستیہ گرہ کریں گے۔‘‘
Published: 25 Mar 2023, 12:20 PM IST
زمین کے عوض نوکری معاملہ میں آج سی بی آئی کی جانب سے بہار کے نائب وزیر اعلیٰ تیجسوی یادو سے پوچھ گچھ کی جا رہی ہے۔ کئی گھنٹوں کی پوچھ گچھ کے بعد تیجسوی یادو لنچ بریک کے لیے سی بی آئی سے نکلے اور سیدھے اپنی حاملہ بیوی سے ملنے گئے جو جنوبی دہلی کے ایک اسپتال میں داخل ہے۔ سی بی آئی ہیڈکوارٹر میں نوکریوں کے معاملے میں آج ان سے دوبارہ پوچھ گچھ کی جائے گی۔
Published: 25 Mar 2023, 12:20 PM IST
راہل گاندھی نے کہا کہ پارلیمنٹ کی رکنیت منسوخ کر کے مجھے ڈرایا نہیں جا سکتا اور میں سوال پوچھتا رہوں گا۔ انہوں نے کہا ’’سوال پوچھنا میں بند نہیں کروں گا۔ نریندر مودی کا اڈانی کے ساتھ کیا رشتہ ہے اور 20 ہزار کروڑ روپے کس کے میں میں پوچھتا رہوں گا، مجھے کسی سے ڈر نہیں لگتا۔ اگر یہ سمجھتے ہیں کہ مجھے نااہل قرار دے کر، دھمکا کر، جیل میں ڈال کر میری آواز بند کر سکتے ہیں تو ایسا نہیں ہوگا۔ میں ہندوستان کی جمہوریت کے لئے لڑ رہا ہوں اور لڑتا رہوں گا۔‘‘
Published: 25 Mar 2023, 12:20 PM IST
پارلیمانی رکنیت منسوخ ہونے کے بعد راہل گاندھی پریس کانفرنس سے خطاب کر رہے ہیں۔ راہل گاندھی نے کہا کہ جمہوریت پر ہر روز حملہ ہو رہا ہے اور اس کی ہر روز نئی مثال سامنے آ رہی ہے۔ سوال میں نے ایک ہی پوچھا تھا کہ اڈانی کی فرضی کمپنیوں میں کسی نے 20 ہزار کروڑ روپے کی سرمایہ کاری کی ہے۔ میں نے یہ پارلیمنٹ میں ثبوت کے ساتھ وزیر اعظم مودی اور اڈانی کے تعلق پر سوال پوچھا۔ سوال پوچھا تھا کہ اڈانی کی فرضی کمپنیوں میں کسی نے 20 ہزار کروڑ کی سرمایہ کاری کی۔ میں نے پارلیمنٹ میں بتایا کہ وزیر اعظم مودی اور اڈانی کے درمیان کیا رشتہ ہے۔ میڈیا رپورٹس کا حوالہ دیتے ہوئے میں نے انہیں ثبوت بھی دیئے۔ میں مودی اور اڈانی کی ہوائی جہاز کی تصویر پارلیمنٹ میں دکھائی۔ اس کے بعد میری تقریر کو حذف کر دیا گیا۔
انہوں نے کہا ’’ میں نے اس کے بعد اسمبلی اسپیکر کو خط لکھا اور بتایا کہ اڈانی کو اصول بدل کر ایئرپورٹ فراہم کئے گئے ہیں۔ انہوں نے کوئی جواب نہیں دیا۔ میرے بارے میں وزرا نے پارلیمنٹ میں جھوٹ بولا کہ میں نے بیرونی قوتوں سے مدد مانگی ہے۔ میں نے اسپیکر سے کہا کہ پارلیمنٹ کا اصول ہے کہ اگر کسی رکن پر کوئی الزام عائد ہوتا ہے تو اس رکن کو جواب دینے کا حق ہے۔ میں نے ایک خط لکھا، جواب نہیں آیا، دوسرا خط لکھا، اس کا بھی جواب نہیں آیا۔ میں نے اس کے بعد اسپیکر سے ملاقات کی اور پوچھا کہ آپ مجھے بولنے کیوں نہیں دے رہے، اسپیکر سر مسکراتے ہیں اور کہتے ہیں کہ یہ میں نہیں کر سکتا!‘‘
Published: 25 Mar 2023, 12:20 PM IST
چنڈی گڑھ یوتھ کانگریس نے راہل گاندھی کو پارلیمنٹ سے نااہل قرار دیے جانے پر نئی دہلی-چنڈی گڑھ شتابدی ٹرین کو چنڈی گڑھ ریلوے اسٹیشن پر روک دیا۔ راہل گاندھی وائناڈ سے سابق رکن پارلیمنٹ تھے۔
Published: 25 Mar 2023, 12:20 PM IST
راہل گاندھی کی لوک سبھا رکنیت منسوخ کئے جانے کے خلاف ان کے پارلیمانی حلقہ میں احتجاج کیا جا رہا ہے۔ یہاں کے لوگوں نے راہل گاندھی کی رکنیت منسوخ ہونے خلاف سخت رد عمل ظاہر کرتے ہوئے کہا کہ اس فیصلے سے ظاہر ہوتا ہے کہ حکومت ان سے خوفزدہ ہیں۔
Published: 25 Mar 2023, 12:20 PM IST
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
Published: 25 Mar 2023, 12:20 PM IST