اہم خبریں LIVE: ’پٹنہ میں اپوزیشن پارٹیوں کی میٹنگ کے بعد بی جے پی کی دھڑکنیں تیز‘، بھوپیش بگھیل

پٹنہ میں اپوزیشن پارٹیوں کی کامیاب میٹنگ کے بعد اپوزیشن پارٹی لیڈران کے بیانات لگاتار سامنے آ رہے ہیں۔ کانگریس لیڈر اور چھتیس گڑھ کے وزیر اعلیٰ بھوپیش بگھیل نے اپنے بیان میں کہا ہے کہ ’’پٹنہ میں اپوزیشن پارٹیوں کی میٹنگ سے بی جے پی کی دھڑکنیں تیز ہو گئی ہیں۔ ان کو لگ رہا ہے کہ ان کے پیروں کے نیچے کی زمین کھسکتی جا رہی ہے۔‘‘

پٹنہ میں اپوزیشن پارٹیوں کی میٹنگ کے بعد مشترکہ پریس کانفرنس سے خطاب کرتے ہوئے بہار کے سابق وزیر اعلیٰ لالو پرساد یادو نے لوک سبھا انتخاب میں بی جے پی کو شکست فاش دینے کا اپنا عزم ظاہر کیا۔ انھوں نے میڈیا سے مخاطب ہوتے ہوئے کہا کہ ’’میں کئی دنوں کے بعد آپ سے بات کر رہا ہوں۔ اب میں بالکل فٹ ہوں، اور میں انھیں (بی جے پی کو) بھی فٹ کر دوں گا۔‘‘

بہار کے وزیر اعلیٰ نتیش کمار نے پٹنہ میں اپوزیشن پارٹیوں کی میٹنگ ختم ہونے کے بعد ایک مشترکہ پریس کانفرنس سے خطاب کیا۔ اس دوران انھوں نے نامہ نگاروں سے کہا کہ ایک ساتھ لوک سبھا انتخاب لڑنے پر سبھی پارٹیوں میں اتفاق قائم ہو گیا ہے۔ اس میٹنگ کے بعد مزید ایک میٹنگ جلد ہونے والی ہے جس میں کئی اہم فیصلے لیے جائیں گے۔

بہار کے وزیر اعلیٰ نتیش کمار کی اپیل پر ملک بھر کی بی جے پی مخالف 15 پارٹیوں نے آج پٹنہ میں انتہائی اہم میٹنگ کی۔ تقریباً ڈھائی گھنٹہ چلی اس میٹنگ میں بی جے پی کے خلاف اتحاد قائم کرنے پر تبادلہ خیال ہوا۔ میٹنگ ختم ہونے کے بعد کانگریس کے قومی صدر ملکارجن کھڑگے نے اپوزیشن اتحاد کا عزم ظاہر کیا اور کہا کہ ’’نفرت کی سیاست کے خلاف ہم لوگ متحد ہو کر آگے بڑھیں گے۔‘‘

پٹنہ میں اپوزیشن لیڈروں کا اجلاس شروع ہو گیا ہے تاکہ آئندہ لوک سبھا انتخابات میں بی جے پی کا مقابلہ کرنے کے لیے مشترکہ حکمت عملی تیار کی جا سکے۔ اجلاس میں 15 سے زائد اپوزیشن جماعتیں شریک ہیں۔

پٹنہ میں اپوزیشن کے اجلاس میں شامل ہونے سے پہلے راہل گاندھی نے کہا کہ کانگریس تلنگانہ، مدھیہ پردیش، چھتیس گڑھ، راجستھان میں جیتے گی۔ بی جے پی کا مقصد کچھ لوگوں کو فائدہ پہنچانا ہے۔ کانگریس غریبوں اور ضرورت مندوں کے لیے کام کرتی ہے۔

انہوں نے کہا کہ بی جے پی کو شکست دینے کا واحد راستہ اتحاد ہے۔ انہوں نے کہا کہ بی جے پی ملک کو تقسیم کر رہی ہے اور نفرت اور تشدد پھیلا رہی ہے جبکہ کانگریس ملک کو متحد کر رہی ہے۔ کانگریس صدر ملکارجن کھڑگے نے بھی پٹنہ میں اپوزیشن کے اجلاس سے پہلے پارٹی کارکنوں سے خطاب کیا۔

کانگریس صدر ملکارجن کھرگے اور پارٹی لیڈر راہل گاندھی اپوزیشن لیڈروں کی میٹنگ کے لیے پٹنہ پہنچ گئے۔ بہار کے وزیر اعلی نتیش کمار نے ہوائی اڈے پر رہنماؤں کا استقبال کیا۔