اہم خبر: چدمبرم 19 ستمبر تک عدالتی حراست میں

نئی دہلی: کانگریس کے سینئر لیڈر اور سابق مرکزی وزیر پی چدمبرم کو مرکزی جانچ بیورو (سی بی آئی) کی خصوصی عدالت نے آئی این ایکس میڈیا معاملے میں جمعرات کو 19 ستمبر تک کےلئے عدالتی حراست میں بھیجنے کا حکم دیا۔ آئی این ایکس میڈیا معاملے میں چدمبرم 22 اگست سے سی بی آئی حراست میں تھے۔ آج حراست کی مدت ختم ہونے پر عدالت نےانہیں عدالتی حراست میں بھیجنے کا حکم دیا۔

خصوصی جج اجے کمار کوہار نے سابق مرکزی وزیر کے وکیل کپل سبل کی اس دلیل کا قبول کرنے سے انکار کر دیا جس میں چدمبرم کو عدالتی حراست میں نہیں بھیجنے کی درخواست کی گئی تھی۔ سابق مرکزی وزیر اس معاملے میں اب 14 دن جیل میں رہیں گے۔ انہیں تہاڑ جیل بھیجا جائے گا۔ واضح رہے کہ چدمبرم کو 21 اگست کی رات کو سی بی آئی نے ان کے گھر سے حراست میں لیا تھا۔

اسلام آباد: وزیر اعظم عمران خان نے کام میں بڑی لاپرواہی کے لئے 27 وزارتوں کو ریڈ لیٹر جاری کئے ہیں۔ وزیر اعظم کے دفتر کی جانب سے جمعرات کو جاری نوٹیفکیشن میں کہا گیا ہے کہ ان وزارتوں کے وزراء کو جو کام سونپے گئے تھے، انہوں نے اسے مکمل کرنے میں کافی تاخیر کی اور اس سے متعلق رپورٹ بھی جمع نہیں کی۔ یہ پہلا موقع ہے جب وزارتوں کو ریڈلیٹر جاری کیا گیا ہے جو آخری وارننگ اور ناپسندیدگی کی علامت سمجھا جاتا ہے۔

پاکستانی میڈیا کے مطابق وزیر اعظم آفس نے وزارتوں سے خالی اسامیوں اور ان کی بھرتیوں سے متعلق تفصیلات طلب کی تھیں اور مذکورہ تفصیلات کے لیے ریڈ لیٹر جاری کرتے ہوئے 9 ستمبر کی آخری ڈیڈلائن بھی دی ہے۔ اس میں مزید کہا گیا کہ تمام متعلقہ وزارتیں ہر سطح پر خالی اسامیوں اور پھر ان کی بھرتیوں سے متعلق رپورٹ جمع کروائیں۔ وزیراعظم آفس نے ہدایت کی کہ اہل ہونے کے باوجود ترقیاں نہ ملنے والے افسران کی تفصیلات بھی فراہم کی جائیں۔اس کے علاوہ گزشتہ 3 ماہ سے زیر التوا سرکاری ملازمین کے خلاف انضباطی کارروائی سے متعلق تفصیلات بھی مانگی گئی ہے۔

آندھرا پردیش کی ایک 74 سالہ خاتون نے جڑواں بچوں کو جنم دیا ہے اور قابل ذکر بات یہ ہے کہ یہ پیدائش آئی وی ایف سسٹم سے ہوئی ہے۔ خاتون کا نام ایرامتی منگیما ہے۔ میڈیا ذرائع کے مطابق پیدا ہونے والی دونوں بچی تندرست ہے اور ماں اس وقت آئی سی یو میں ہے۔ اہلیہ اسپتال، جہاں بچوں کی ولادت ہوئی ہے، کے ڈاکٹر ڈاکٹر اوما شنکر نے میڈیا کو بتایا کہ اس پیدائش میں آئی وی ایف طریقہ کا استعمال کیا گیا اور کسی ڈونر سے بیضہ لے کر اسپرم خاتون کے شوہر کا استعمال کیا گیا۔

اتر پردیش کے رام پور سے سماجوادی پارٹی کے رکن پارلیمنٹ اعظم خان پر لگاتار شکنجہ کستا جا رہا ہے۔ اعظم کے ہمسفر ریسورٹ پر بجلی محکمہ کے افسروں نے چھاپہ ماری کی ہے۔ اس دوران بجلی چوری پکڑی گئی۔ بجلی چوری کا انکشاف ہونے کے بعد بجلی محکمہ کے ملازمین نے وہاں کا بجلی کنکشن کاٹ دیا ہے۔

جموں و کشمیر ایشو کے پیش نظر ہندوستان پاکستان کی ہر چھوٹی سی چھوٹی حرکت پر نظر رکھے ہوئے ہے۔ تازہ خبروں کے مطابق پاکستان نے اپنے 2000 سیکورٹی اہلکاروں کو سرحد کے قریب بھیجا ہے اور ہندوستانی فوج ان کی سرگرمیوں پر نظر جمائے ہوئی ہے۔

دہلی کے نریلا میں ایک زیر تعمیر عمارت میں اندوہناک حادثہ پیش آیا ہے۔ میڈیا ذرائع کے مطابق زیر تعمیر عمارت کی 13ویں منزل سے اچانک لفٹ نیچے کی طرف گری جس کی زد میں آنے سے کم از کم 14 مزدور زخمی ہو گئے ہیں۔ زخمی سبھی مزدوروں کو قریب کے اسپتال میں داخل کرایا گیا ہے۔ اس درمیان حادثہ سے ناراض لوگوں نے فلیٹوں میں کافی توڑ پھوڑ کی ہے۔ موقع پر پولس کی ٹیم پہنچ گئی ہے اور پورے معاملے کی تفتیش کر رہی ہے۔

دہلی کے سبھی چار سابق کانگریس صدور یعنی اروندر سنگھ لولی، اجے ماکن، جے پرکاش نارائن اور سبھاش چوپڑا کو پارٹی کی صدر سونیا گاندھی نے اپنی رہائش گاہ پر بلایا تھا۔ ان کے ساتھ سونیا گاندھی کی میٹنگ ہوئی ہے جس کے بعد سیاسی ہلچل بڑھ گئی ہے۔

جموں و کشمیر سے دفعہ 370 ہٹائے جانے کے خلاف کئی عرضیاں سپریم کورٹ میں داخل کی گئی ہیں جس پر سماعت کے لیے عدالت عظمیٰ نے 16 ستمبر کا تاریخ مقرر کیا ہے۔

سپریم کورٹ نے آئی این ایکس میڈیا کیس میں انفورسمنٹ ڈائریکٹوریٹ کے ذریعہ کی جا رہی جانچ کے معاملے میں پی چدمبرم کی پیشگی ضمانت عرضی خارج کر دی ہے۔ فی الحال چدمبرم آئی این ایکس میڈیا کیس میں ہی سی بی آئی کی حراست میں ہیں۔ سپریم کورٹ نے کہا کہ ’’شروعاتی مراحلہ میں پیشگی ضمانت عرضی دینا جانچ کو نقصان پہنچا سکتا ہے۔ یہ پیشگی ضمانت دینے کے لیے ایک مناسب معاملہ نہیں ہے۔ معاشی جرائم الگ الگ سطح پر ہیں اور اسے الگ نظریہ کے ساتھ نمٹایا جانا چاہیے۔‘‘

کانگریس جنرل سکریٹری پرینکا گاندھی نے بی جے پی حکومت کو معاشی بحران کے مدنظر تنقید کا نشانہ بنایا ہے۔ پرینکا گاندھی ایک ٹوئٹ میں لکھا ہے کہ ہر دن مندی کی خبر اور ہر دن بی جے پی حکومت کی اس پر خاموش، دونوں ہی بہت خطرناک ہے۔ انھوں نے مزید لکھا کہ ’’اس حکومت کے پاس نہ حل ہے نہ ملک کے باشندوں کو بھروسہ دلانے کی طاقت۔ صرف بہانہ بازی، بیان بازی اور افواہیں پھیلانے سے کام نہیں چلے گا۔‘‘

میڈیا ذرائع کے مطابق دفعہ 370 ہٹائے جانے کے بعد جموں و کشمیر میں حالات دھیرے دھیرے معمول پر آ رہے ہیں۔ سری نگر کے ضلع مجسٹریٹ شاہد چودھری نے کہا ہے کہ بدھ کی شب سے ہی وادی میں زیادہ تر ٹیلی فون خدمات شروع کر دی گئی ہیں۔ انھوں نے کہا کہ وادی میں موبائل خدمات بھی دیرے دھیرے بحال کی جا رہی ہیں۔ شاہد چودھری کے مطابق کپواڑا کے کچھ علاقوں میں پہلے ہی ٹیلی فون خدمات بحال کر دیے گئے ہیں۔ ضلع مجسٹریٹ نے صبر سے کام لینے کے لیے عوام کا شکریہ ادا کیا ہے اور ساتھ ہی پیش آئے مسائل کے لیے معافی بھی مانگی۔