ہندوستان نے پہلے دہشت گردوں کے ٹھکانوں پر کیا حملہ، اور اب پاکستانی آبی ذخائر کو بم سے کیا تباہ

پاکستان مقبوضہ کشمیر میں دہشت گردوں کے ٹھکانوں پر حملہ کے بعد ہندوستانی فوج نے پاکستان کو مزید ایک گہری چوٹ دی ہے۔ ہندی نیوز پورٹل ’ٹی وی 9 بھارت ورش‘ نے پاکستانی فوج کے حوالے سے یہ خبر دی ہے کہ سرجیکل اسٹرائیک کے بعد ہندوستانی فضائیہ کے جوانوں نے اس کے آبی ذخائر کو تباہ کر دیا ہے۔

ایسو سی ایٹیڈ پریس نے اس حوالے سے اپنی ایک رپورٹ میں بتایا ہے کہ پاکستان کے 9 ٹھکانوں پر سرجیکل اسٹرائیک کے بعد ہندوستانی فوج کے جوانوں نے نیلم ندی کے نوسیری پشتہ پر بم گرا دیا۔ بم گرنے سے پشتہ بری طرح متاثر ہوا ہے۔ نوسیری پشتہ سے بجلی پیداوار کا عمل انجام دیا جاتا ہے۔ پاکستانی فوج کا کہنا ہے کہ سرجیک اسٹرائیک کے بعد تقریباً 2 بجے نوسیری پشتہ پر بم گرایا گیا، جس سے پشتہ کو نقصان پہنچا ہے۔ پاکستان نے اسے بین الاقوامی قوانین کی خلاف ورزی قرار دیا ہے۔ حالانکہ ہندوستان کا فی الحال اس معاملے میں کوئی رد عمل سامنے نہیں آیا ہے۔

قابل ذکر ہے کہ وادیٔ نیلم ہندوستانی سرحد سے محض 3 کلومیٹر دور واقع ہے۔ یہ پاکستان مقبوضہ کشمیر کا حصہ ہے۔ پہلگام حملہ کے بعد پاکستان کا وادیٔ نیلم علاقہ ہی سب سے زیادہ متاثر ہوا ہے۔ سرجیکل اسٹرائیک سے متعلق ہندوستانی وزارت خارجہ کا کہنا ہے کہ یہ اسٹرائیک انہی علاقوں میں کیا گیا ہے، جہاں پر دہشت گردوں کے کیمپ تھے۔ ہندوستان نے جیش محمد کے 4، لشکر طیبہ کے 3 اور حزب المجاہدین کے 2 کیمپوں کو تباہ کر دیا ہے۔ ہندوستانی وزارت خارجہ کے مطابق یہ دہشت گرد تنظیمیں پھر سے حملہ کرنے کی تیاری میں تھے۔