’لالچی ٹرمپ نے پاکستان سے پیسے لے کر ہندوستان سے تعلقات خراب کر لیے‘، سابق امریکی سفیر امینوئل کا دعویٰ

سابق امریکی صدر براک اوباما کے چیف آف اسٹاف اور جاپان میں امریکہ کے سابق سفیر رہے امینوئل نے ڈونالڈ ٹرمپ پر سنگین الزام عائد کیا ہے۔ انہوں نے جمعرات (16 اکتوبر) کو کہا کہ ٹرمپ نے ہندوستان-امریکہ تعلقات کو کافی نقصان پہنچایا ہے۔ امینوئل نے ٹرمپ کو لالچی قرار دے دیا، انہوں نے کہا کہ ٹرمپ نے تکبر اور پاکستان سے ملے کچھ پیسوں کے لیے ہندوستان کے ساتھ رشتوں کو خراب کر لیا ہے۔

سابق امریکی سفیر امینوئل نے ایک انٹرویو کے دوران کہا کہ ’’چین کے مقابلے ہندوستان امریکہ کے لیے ایک بڑا اسٹریٹجک توازن ہو سکتا تھا۔ وہ مینیوفیکچرنگ اور ٹیکنالوجی کے شعبہ کے ساتھ ساتھ فوجی تعاون میں بھی امریکہ کے لیے فائدہ مند ہو سکتا تھا، لیکن امریکی صدر نے اپنے فیصلوں سے ہندوستان کے ساتھ رشتوں کو تباہ کر دیا۔ انہوں نے امریکہ کی 40 سالہ اسٹریٹجک تیاریوں پر پانی پھیر دیا۔‘‘

امینوئل نے ہندوستان کے ساتھ رشتوں کو خراب کرنے کے لیے مکمل طور سے ڈونالڈ ٹرمپ کو ذمہ دار ٹھہرایا ہے۔ انہوں نے اسے ٹرمپ کی سب سے بڑی غلطی قرار دیا ہے۔ سابق امریکی سفیر نے کہا کہ ’’دونوں ممالک کی جمہوری حکومتوں نے اس شرکت داری کو اعتماد کی بنیاد پر بنایا تھا، جسے برباد کر دیا گیا۔‘‘

واضح رہے کہ گزشتہ کچھ ماہ سے ہندوستان اور امریکہ کے تعلقات ٹھیک نہیں چل رہے ہیں۔ امریکی صدر ڈونالڈ ٹرمپ ’آپریشن سندور‘ کے بعد سے ہی پاکستان کے کافی قریب ہو گئے ہیں۔ پاکستان کے وزیر اعظم شہباز شریف اور آرمی چیف عاصم منیر نے ڈونالڈ ٹرمپ سے ملاقات بھی کی تھی۔ دوسری جانب ڈونالڈ ٹرمپ نے ہندوستان پر 50 فیصد ٹیرف عائد کر کے دونوں ممالک کے تعلقات کو خراب کر دیے ہیں۔