حکومت اعلی عدالتوں کے ججوں کی ریٹائرمنٹ عمر دو سال بڑھا سکتی ہے

مرکزی حکومت اس بات پر غور کر رہی ہے کہ سپریم کورٹ کے ججو کی ریٹائرمنٹ کی عمر 65 سے بڑھاکر 67 کر دی جائے اور ہائی کورٹ کے ججوں کی عمر 62 سے بڑھاکار 64 کر دی جائے۔ ججوں کی عمر کو بڑھانے کے لئے آئین میں ترمیم کی ضرورت ہے اور حکومت کی کوشش ہے کہ آج سے شروع ہوئے مانسون اجلاس میں یہ ترمیم منظور کرا لی جائے ۔حکومت اس ترمیم کو منظور کرانے کے لئے پینڈنگ کیسوں کی تعداد اور ججو ں کی بھاری کمی کا حوالہ دے سکتی ہے۔

ان عدالتوں میں ججوں کی کمی کے پیش نظر پارلیمانی کمیٹی نے جج حضرات کی ریٹائرمنٹ عمر بڑھانے کی سفارش کی ہے ۔ اس کمیٹی کی یہ بھی سفارش ہے کہ عدالتوں میں پینڈنگ کیسوں کی تعداد کم کرنے کی غرض سے ججوں کی خالی آسامیوں کو بھی پر کرنا ضروری ہے۔

واضح رہے کہ وزارت قانون کے تازہ اعداد و شمار کے مطابق ملک کی 24 ہائی کورٹوں میں ججوں کی 406 آسامیاں خالی ہیں جس میں الہ آباد کورٹ میں 56، کرناٹک کورٹ میں 38، کولکتہ کورٹ میں 39، پنجاب اور ہریانہ کورٹ میں 35، آندھرا اور تلنگانہ کورٹ میں 30اور ممبئی کورٹ میں 40 آسا میاں خالی ہیں۔اس سے قبل سال 2010 میں یو پی اے حکومت نےججوں کی ریٹائرمنٹ عمر بڑھانے کی تجویز پیش کی تھی۔