الحرمین الشریفین کے امور کے لیے 41 خواتین کی اعلی عہدوں پر تقرری

سعودی عرب میں خواتین کو ڈرائیونگ کی اجازت کے بعد سے کئی اہم امور میں ان کو ذمہ داری دیئے جانے کی خبریں آج کل عام ہیں۔ اس تعلق سے اب ایک اہم خبر یہ آ رہی ہے کہ الحرمین الشریفین کے امور کے نگراں ادارے کے سربراہ الشیخ ڈاکٹر عبدالرحمان السدیس نے ملک کی تاریخ میں پہلی بار حرمین میں خدمات کی انجام دہی کے لیے 41 خواتین کی اعلیٰ عہدوں پر تقرری کا حکم جاری کیا ہے۔ خواتین کو حقوق دینے کے تعلق سے یہ ایک تاریخی تبدیلی ہے۔

’العربیہ ڈاٹ نیٹ‘ کی خبر کے مطابق الحرمین الشریفین کی جنرل پریزیڈنسی کی طرف سے جاری کردہ ایک بیان میں کہا گیا ہے کہ ویژن 2030ء کے مطابق مسلمان خواتین کی صلاحیتوں سے استفادہ کرتے ہوئےعمومی قومی مفاد کے پیش نظر اُنہیں مختلف اُمور کی انجام دہی کے لیے تعینات کرنے کی سفارش کی گئی ہے۔

بیان میں کہا گیا ہے کہ ریاستی اداروں اور سروسز کی فراہمی میں مسلمان خواتین کلیدی عامل ہیں۔ یہی وجہ ہے کہ الحرمین الشریفین کے امور کی انجام دہی میں ان کی خدمات حاصل کی جا رہی ہیں۔ شرعی ضوابط کے دائرے میں رہتے ہوئے ملک کی تعمیر وترقی اور خوش حالی میں خواتین کے کردار کا عوامی سطح پر بھی خیر مقدم کیا جا رہا ہے۔ شہزادہ سلمان کی جانب سے جاری ان اصلاحات کو مسلم مملک میں کافی ستائش کی نظروں سے دیکھا جا رہا ہے۔