مغربی بنگال انتخابات: نندی گرام میں پولنگ سے قبل دفعہ 144 نافذ

کولکاتا: الیکشن کمیشن نے دوسرے مرحلے کی پولنگ سے قبل نندی گرام میں دفعہ 144 نافذ کر دی ہے۔ نندی گرام میں ممتا بنرجی کے خلاف ان کے سابق معاون سویندو ادھیکاری انتخاب لڑ رہے ہیں۔ انہوں نے دسمبر میں ہی ترنمول کانگریس چھوڑ کر بی جے پی میں شمولیت اختیار کی تھی۔

الیکشن کمیشن کی جانب سے جاری نوٹس کے مطابق مشرقی مدنی پور ضلع میں ہلدیہ کے سب ڈویژنل مجسٹریٹ اونیت پنیا نے منگل کے روز الیکشن کمیشن کی خصوصی ہدایت کے مطابق اور تشدد، امن و امان کی فضا بگاڑنے اور غیر یقینی واقعات کے امکان کے پیش نظر پورے علاقے میں دفعہ 144 نافذ کر دی۔ علاوہ میں دفعہ 144 کا اطلاق 30 مارچ کی شام ساڑھے 6 بجے سے 2 اپریل تک رہے گا۔

حکم نامے کے مطابق پولنگ کے احاطے سے 200 میٹر کے فاصلے پر انتخابی ڈیوٹی پر مامور رہنے والے افراد اور ووٹروں کو چھوڑ کر پانچ یا اس سے زیادہ افراد پر مشتمل مجمع لگانا ممنوع رہے گا۔ اس سے علاوہ پولنگ اسٹیشن کے احاطے کے 100 میٹر کی حدود میں کوئی عام شخص موبائل فون اور وائرلیس سیٹ کا استعمال نہیں کر سکے گا۔

انتخابات کے دوسرے مرحلے کے دوران جنوبی 24 پرگنہ، مغربی مدنی پور، بانکوڑہ، مشرقی مدنی پور کے 30 اسمبلی حلقوں میں پولنگ ہوگی۔ اس مرحلے میں 171 امیدوار میدان میں ہیں، جن میں سے 152 امیدوار مرد ہیں جبکہ صرف 19 خواتین ہیں۔ نندی گرام کی سیٹ سب سے اہم ہو گئی ہے۔ یہاں سے ممتا بنرجی اور بی جے پی کے سویندو ادھیکاری مقابلہ کر رہے ہیں۔ سویندو نے دعویٰ کیا تھا کہ یہاں سے انہوں نے اگر 50 ہزار سے زاید ووٹوں سے انتخاب نہیں جیتا تو وہ سیاست چھوڑ دیں گے۔ ادھر، ممتا بنرجی بھی اپنی جیت کے لئے پر اعتماد ہیں۔