’یہ ملک کی بڑی آزمائش، مشترکہ کوششوں سے نمٹیں گے‘، مغربی ایشیا بحران پر راجیہ سبھا میں وزیر اعظم مودی کا بیان

نئی دہلی: وزیر اعظم نریندر مودی نے راجیہ سبھا میں مغربی ایشیا میں جاری کشیدگی کو ہندوستان کے لیے ایک بڑی آزمائش قرار دیتے ہوئے کہا ہے کہ اس صورتحال سے نمٹنے کے لیے مرکز اور ریاستوں کو مل کر کام کرنا ہوگا۔ انہوں نے بتایا کہ حکومت نے حالیہ حالات کے پیش نظر سات نئے بااختیار گروپس تشکیل دیے ہیں، جو سپلائی چین، پٹرول اور ڈیزل، گیس، کھاد اور مہنگائی جیسے اہم شعبوں پر فوری اور طویل مدتی حکمت عملی کے تحت کام کریں گے۔

وزیر اعظم مودی نے کہا کہ کورونا کے دوران بھی اسی طرز پر ماہرین اور افسران کے گروپس نے مؤثر کردار ادا کیا تھا اور اب ایک بار پھر ویسا ہی نظام قائم کیا گیا ہے تاکہ کسی بھی ممکنہ بحران کا بروقت مقابلہ کیا جا سکے۔ انہوں نے کسانوں کو یقین دہانی کرائی کہ آئندہ بوائی کے موسم میں کھاد کی کمی نہیں ہونے دی جائے گی اور حکومت اس کے لیے ضروری تیاری کر چکی ہے۔

انہوں نے ریاستی حکومتوں سے اپیل کی کہ وہ اس نازک وقت میں غریبوں، مزدوروں اور مہاجرین کا خاص خیال رکھیں اور اس بات کو یقینی بنائیں کہ وزیر اعظم غریب کلیان اَنّ یوجنا کا فائدہ وقت پر مستحقین تک پہنچے۔ وزیر اعظم نے یہ بھی کہا کہ جہاں مہاجر مزدور کام کر رہے ہیں وہاں ان کی مشکلات کو دور کرنے کے لیے پیشگی اقدامات کیے جائیں اور خصوصی نگرانی کا نظام قائم کیا جائے۔

نریندر مودی نے خبردار کیا کہ ایسے بحران کے دوران ذخیرہ اندوزی اور کالا بازاری کے واقعات بڑھ سکتے ہیں، اس لیے ریاستوں کو سختی سے کارروائی کرنی ہوگی اور ضروری اشیاء کی سپلائی کو بلا رکاوٹ جاری رکھنا ہوگا۔

مغربی ایشیا کی صورتحال پر بات کرتے ہوئے وزیر اعظم نے کہا کہ اس تنازع نے عالمی سطح پر توانائی کے بحران کو جنم دیا ہے، جس کے اثرات ہندوستان پر بھی پڑ رہے ہیں۔ انہوں نے بتایا کہ ہندوستان مختلف ممالک کے ساتھ مسلسل رابطے میں ہے اور سفارتی سطح پر مسئلے کے حل کے لیے کوششیں جاری ہیں۔

انہوں نے واضح کیا کہ ہندوستان نے ہمیشہ بات چیت کے ذریعے مسئلے کے حل کی وکالت کی ہے اور ایران، اسرائیل اور امریکہ سمیت خطے کے اہم ممالک کے ساتھ مسلسل گفتگو جاری ہے۔ وزیر اعظم نے کہا کہ اسٹریٹ آف ہرمز میں پھنسے جہازوں اور ان میں سوار ہندوستانی عملے کی سلامتی حکومت کی ترجیح ہے اور اس سلسلے میں ہر ممکن سفارتی قدم اٹھایا جا رہا ہے۔

وزیر اعظم نے بتایا کہ اب تک لاکھوں ہندوستانی شہریوں کو محفوظ واپس لایا جا چکا ہے اور حکومت بیرون ملک مقیم ہندوستانیوں کی حفاظت کو یقینی بنانے کے لیے پوری سنجیدگی کے ساتھ کام کر رہی ہے۔ انہوں نے کہا کہ توانائی سپلائی کو برقرار رکھنے کے لیے بھی اقدامات کیے جا رہے ہیں تاکہ ملک میں ضروری اشیاء کی دستیابی متاثر نہ ہو۔