ہمیں فیصلہ کرنا چاہیے کہ مرکزی حکومت سے ڈرنا ہے یا لڑنا ہے: ادھو ٹھاکرے

کانگریس صدر سونیا گاندھی کے ذریعہ طلب کی گئی سات ریاستوں کے وزرائے اعلیٰ کی میٹنگ میں مہاراشٹر کے وزیر اعلیٰ ادھو ٹھاکرے نے مرکز کی مودی حکومت کو زبردست طریقے سے تنقید کا نشانہ بنایا۔ انھوں نے مودی حکومت پر الزام عائد کیا کہ وہ غیر بی جے پی وزرائے اعلیٰ کو دبانے کی کوشش کرتی ہے جو کہ مناسب نہیں ہے۔ میٹنگ کے دوران ادھو ٹھاکرے نے واضح لفظوں میں کہا کہ "ہمیں فیصلہ کرنا چاہیے کہ ہمیں مرکزی حکومت سے ڈرنا ہے یا لڑنا ہے۔"

ادھو ٹھاکرے نے غیر بی جے پی حکمراں ریاستوں کے وزرائے اعلیٰ کی میٹنگ سے مخاطب ہوتے ہوئے کہا کہ "ہمیں مرکزی حکومت کے خلاف آواز اٹھانی چاہیے۔ غیر بی جے پی حکمراں ریاستوں کے وزرائے اعلیٰ کو زوردار طریقے سے اپنی آواز اٹھانی چاہیے کیونکہ مرکزی حکومت ہماری آواز کو دبانے کی کوشش کر رہی ہے۔" اس موقع پر سونیا گاندھی نے بھی مرکزی حکومت کے خلاف آواز اٹھانے کی بات کہی۔ انھوں نے مودی حکومت کو تنقید کا نشانہ بناتے ہوئے کہا کہ "مرکزی حکومت کے خلاف ہمیں ساتھ مل کر کام کرنا ہوگا اور لڑنا ہوگا۔"