ملک کی بھلائی کے لئے سخت فیصلے کرنے پڑے: امت شاہ

نئی دہلی: مرکزی وزیر داخلہ امت شاہ نے کہا ہے کہ ملک کے مسئلوں کو سلجھانے کےلئے کئی بار سخت فیصلے کرنے پڑتے ہیں اور ان سے کچھ وقت کے لئے پریشانی ہوتی ہے لیکن یہ سب عوام کی بھلائی اور ملک کی ترقی کو توجہ میں رکھ کر کیےجاتے ہیں۔

شاہ نے منگل کو آل انڈیا منجمنٹ فیڈریشن (آئی آئی ایم ایف) کے 46 ویں سالانہ کانفرنس سے خطاب کرتے ہوئے کہا کہ وزیراعظم نریندر مودی کی قیادت میں عالمی سطح پر ہندوستان کی نئی پہچان بنی ہے اور پوری دنیا ہندوستان کی آواز کو سنتی ہے اور انہوں نے ایک نئے ہندوستان کا تصور کیا ہے جو خوشحال اور ہر طرح سے قابل ہو۔

انہوں نے کہا کہ آج نریندر مودی کی سالگرہ ہے اور ہم سبھی یہی دعا کرتے ہیں کہ وہ صحت مند رہیں اور لمبے وقت تک ملک کی قیادت کرتے رہیں۔ امت شاہ نے کہا کہ آج ہی کے دن سردار پٹیل نے حیدرآباد کو نظام کی حکومت سے آزادی دلاکر اسے ہندوستان کا حصہ بناکر اپنی مضبوط پالیسی کا ثبوت دیا تھا اور نریندر مودی نے انہی کی طرح نئے ہندوستان کا تصور کیا ہے اور کچھ ہدف بھی طے کیے ہیں۔

شاہ نے کہا کہ آج سے پانچ سال پہلے ہندوستان کی حالت کچھ اور تھی اور اب 2019 کا ہندوستان اپنے آپ میں اتنا قابل ہے کہ اپنی حفاظت کے لئے سرجیکل اسٹرائیک کر کے دشمنوں میں خوف پیدا کرنے سے بھی پیچھے نہیں ہٹتا اور یہ سبھی نریندر مودی جی کی قیادت میں ہی ممکن ہوسکا ہے۔

وزیر داخلہ نے کہا کہ نریندر مودی ہمیشہ ملک کے عوام کی ترقی کی بات سوچتے ہیں اور یہی وجہ ہے کہ 2014 میں اقتدار میں آتے ہی انہوں نے غریب لوگوں کی بینکنگ سیکٹر تک پہنچ بنانے کے لئے جن دھن یوجنا کے تحت سبھی کے بینک کھاتے کھلوائے اور ملک میں 2013 کے صرف 58فیصد کے مقابلے اس وقت 99.04 فیصد لوگوں کے بینک کھاتے ہیں۔

انہوں نے کہا کہ نریندر مودی سخت فیصلے کرنےسے کبھی پیچھے نہیں ہٹتے اور اس کی سب سے بڑی مثال جموں و کشمیر کو خصوصی درجہ دینے والا قانون آرٹیکل 370 اور 35اے کو منسوخ کرنا ہے۔ پانچ اگست سے لے کر اب تک کشمیر میں ایک بھی گولی نہیں چلی ہے اور نہ ہی کسی شخص کی موت ہوئی ہے۔ اس کے پیچھے حکومت کی دور اندیشی اور فیصلوں پر سختی سے عمل کرنے کی پالیسی ہے۔